— काइ हाभरटेजले गरेको एक मात्र गोलको मद्धतले आर्सनलले इंग्लिस प्रिमियर लिगमा शुक्रबार इपस्विच टाउनलाई १–० ले हराएको छ । र, लिग तालिकाको दोस्रो स्थानमा उक्लेको छ । यो जितपछि आर्सनलको १८ खेलबाट ३६ अंक भएको छ ।
यो शीर्षमा रहेको लिभरपुलसँग छ अंकको दूरी हो । चेल्सी ३५ अंकमा तेस्रोमा झरेको छ । इमिरेट्स स्टेडियममा भएको खेलमा लियानड्रो ट्रोसार्डको क्रस उपयोग गर्दै हाभरटेजले २३ औं मिनेटमा निर्णायक गोल गरे ।
आफ्नो घरेलु मैदानमा आर्सनलले ८३ प्रतिशत भन्दा बढी खेल नियन्त्रणमा राखेको थियो । रेलिगेसनबाट बच्न संघर्षरत इपस्विच १२ अंकमा पुछारबाट दोस्रो स्थानमा छ । शुक्रबारकै अर्को खेलमा ब्राइटन र ब्रेन्टफोर्डले निराशाजनक गोलरहित बराबरी खेलेका छन् ।
ब्राइटनले आफ्नो अमेरिकन एक्सप्रेस स्टेडियममा भएको खेलको फाइदा लिन सकेन् । प्रिमियर लिगमा ब्राइटन पछिल्ला छ खेलमा जितहीन रहेको छ । ब्राइटन २६ अंकमा दसौं स्थानमा छ भने उसको ठीक पछाडि ब्रेन्टफोर्डको २४ अंक रहेको छ ।
