— आईएमई समूहले कैलालीको कर्णाली चिसापानीमा जालपादेवी केबलकार निर्माण गर्ने भएको छ । लम्कीचुहा नगरपालिका–३ मा बन्ने केबलकार ३.१ किलोमिटर लामो हुने समूहले जनाएको छ । परराष्ट्रमन्त्री आरजु राणा देउवाले शनिबार केबलकारको शिलान्यास गरिन् ।
चिसापानीदेखि मोहन्याल गाउँपालिका–७ राजकाँडासम्म पुग्ने केबलकारमा ३४ वटा गोन्डोला हुनेछन् । पाँच अर्ब रुपैयाँ लगानी हुने केबलकारको बटम स्टेसनमा केबलकार, होटल, क्यासिनो र ब्यांक्वेट हल निर्माण हुने निर्माण कम्पनीले जनाएको छ ।
यसैगरी टप स्टेसनमा रिसोर्ट, मन्दिर, स्काई वाक, वकिङ ट्रेल, रेस्टुरेन्ट तथा चिल्ड्रेन पार्कसहित अन्य पर्यटकीय तथा मनोरञ्जनात्मक पूर्वाधार निर्माण हुनेछन् ।
केबलकार निर्माणले समग्र सुदूरपश्चिम प्रदेशको आर्थिक, सामाजिक तथा सांस्कृतिक विकासमा उल्लेख्य भूमिका खेल्ने परराष्ट्रमन्त्री आरजुले बताइन् । ‘सुदूरपश्चिम पर्यटन, संस्कृति, परम्परा र जैविक विविधतामा धनी छ,’ उनले भनिन्, ‘सुदूरपश्चिम क्षेत्रका समुदाय विकासप्रेमी पनि छन् ।’ सुदूरपश्चिम प्रदेशमा बन्ने यस केबलकार र होटलसहितको भव्य पर्यटकीय पूर्वाधारले सुदूरपश्चिम तथा मुलुककै समृद्धिका लागि ठूलो उपलब्धि हुने उनको भनाइ छ ।
वन तथा वातावरणमन्त्री ऐनबहादुर शाहीले पनि केबलकार तथा अन्य पूर्वाधारले सुदूरपश्चिम प्रदेशको विकासमा उल्लेखनीय भूमिका खेल्ने बताए । ‘सुदूरपश्चिम, कर्णाली तथा लुम्बिनी प्रदेशमा आधुनिक विकासका ठूला पूर्वाधार निकै कम छन्,’ उनले भने, ‘यस्ता पूर्वाधारका थप आयोजना लिएर हाम्रो क्षेत्रमा आउनुहोस् । हामी तपाईंहरूलाई स्वागत गर्दछौं ।’
सुदूरपश्चिम प्रदेशको प्रवेशद्वार कर्णालीको चिसापानीमा निर्माण हुने केबलकार र रिसोर्टले साहसिक, धार्मिक र मनोरञ्जन पर्यटनलाई बढावा दिने सुदूरपश्चिम प्रदेशका मुख्यमन्त्री कमलबहादुर शाहले जनाए । पर्यटनले मात्र नेपालको आर्थिक, सांस्कृतिक र सामाजिक मुलुकको कायापलट गर्न सम्भव रहेको र पर्यटन पूर्वाधन बनाउन आवश्यक रहेको जालपादेवी केबलकार प्रालिका अध्यक्ष चन्द्रप्रसाद ढकालले बताए ।
