— मार्के ब्रेसिनिनीले खेलको अन्त्यतिर गोल गरेपछि एटलान्टाले इटालीको सिरी ए मा शनिबार लाजियोलाई १–१ को बराबरीमा रोकेको छ । लाजियोले फिसायो डेल–बासिरुको गोलले पहिलो हाफमा अग्रता लिएको थियो र टिम जिततर्फ अग्रसर देखिएको थियो ।
तर खेलको ८८ औं मिनेटमा ब्रेसिनिनीले बराबरी गोल गरे । यो नतिजापछि एटलान्टाको ११ खेलको लगातार जित क्रम टुटेको छ । तर टिम भने अझै अंक तालिकाको शीर्षमा छ । उसको १८ खेलबाट ४१ अंक भएको छ ।
यो दोस्रो स्थानमा रहेको इन्टर मिलानसँग एक अंकका मात्र दूरी हो । इन्टरले अर्को खेलमा कागलिरीलाई ३–० ले हरायो । डिफेन्डिङ च्याम्पियनका लागि एलेसान्ड्रो बास्टोनी, लउटारो मार्टिनेज र हाकान चाहानग्लुले गोल गरे ।
इन्टरले १७ खेल मात्र खेलेको छ र उसकासामु अब एटलान्टालाई उछिन्ने अवसर हुनेछ । शनिबारका अन्य खेलमा पार्माले मोन्जा तथा जेनोआले इम्पोलीलाई समान २–१ ले हरायो ।
