सम्बन्ध विच्छेद गर्ने दम्पतीलाई सरकारले दिने रकमको लोभमा एउटा दम्पतीले एक आपसमा १२ पटक सम्बन्ध विच्छेद गरेका छन् ।
अष्ट्रियाको ग्राज सहरमा बस्ने उक्त दम्पतीले दाम्पत्य जिवनको ४३ वर्षभित्र १२ पटक कानूनी डिभोर्स गरेका हुन् ।
भियना प्रहरीले अहिले यो अनौठो घटनाको अनुसन्धान गरिरहेको छ । विधवा महिलालाई सरकारी दिने जिवन निर्वाह भत्ता अर्थात् एकल महिला पेन्सन बापतको वार्षिक करिब ३० हजार युरो पाउनका लागि उक्त दम्पतीले एक आपसमा श्रृंखलाबद्ध डिभोर्स गरेको हो ।
पहिलो पतिको सन् १९८१ मा मृत्यु भएपछि ती महिलाले उक्त भत्ता पाउन थालेकी थिइन् । पहिलो पतिको मृत्यु भएको अर्को वर्ष नै दोस्रो बिहे गरेता पनि विधवाको रुपमा पाउने पेन्सलाई खाइराख्नका लागि उनले त्यसयता लगालग दोस्रो पतिसँग १२ पटक डिभोर्स गरेकी छन् ।
अष्ट्रियन कानून अनुसार विधवा महिलाले दोस्रो बिहे नगरेसम्म उक्त जिवन निर्वाह भत्ता प्रयोग गर्न पाउँछिन् । साथै उनले हरेक अढाई वर्षमा आफ्नो वार्षिक विधवा पेन्सनको साढे दुईगुणा रकम पाउने गर्थिन् । त्यसले उनको दोस्रो पतिसँग उनले प्रत्येक तीन वर्षमा कागजी डिभोर्स गर्ने गरेको खुलासा भएको छ । उक्त पेन्सन रकम हात पारेपछि भने उनीहरुले पुनः बिहे गर्थे।
तर, उक्त ठग दम्पतीको ठगी धन्दा सन् २०२२ को मे महिनामा मात्रै चर्चामा आयो । आफ्नो दोस्रो पतिसँग १२ पटक डिभोर्स गरेकी ती महिलालाई पेन्सन विमान संस्थानले विधवा पेन्सन दिन अस्वीकार गरेपछि यो विषय सार्वजनिक भएको हो ।
त्यसपछि गरिएको अनुसन्धानले उक्त दम्पतीले पेन्सन लिनका लागि हरेक पटक डिभोर्स गर्ने र हरेक ३ वर्षमा बिहे गर्ने गरेको देखाएको छ ।
अनुसन्धान अनुसार उक्त दम्पती ग्राज सहरमा एउटै घरभित्र वर्षौंदेखि सँगै बस्ने, सँगै खाने तथा सँगै सुत्ने गरेका छन् ।छिमेकीहरुलाई उनीहरुले डिभोर्स गर्ने र पुनः बिहे गर्ने गरेको थाहै थिएन । वास्तवमा छिमेकीहरुले उनीहरुलाई कहिल्यै नछुट्टिने नमुना जोडीको रुपमा लिन्थे ।
एक दम्पतीले चार दशकसम्म कानूनी लूपहोलको दुरुपयोग गरेको यो घटनासँगै अष्ट्रिया सरकारलाई एकल महिलाको निर्वाह भत्ता सम्बन्धी कानूनी छिद्र टाल्न प्रेरित गरेको छ ।
गत मार्च महिनामा अष्ट्रियाको सर्वोच्च अदालतले गरेको फैसलामा भनिएको छः वास्तविकतामा नछुट्टिइकनै केवल विधवा पेन्सनमा दाबी गर्नकै लागि एउटै दम्पतीले पटक-पटक बिहे गर्ने र लगत्तै डिभोर्स गर्नु भनेको कानूनको दुरुपयोग हो ।
उक्त दम्पतीमाथि अहिले ठगीको मुद्दा चलिरहेको छ । अभियोजनकर्ताका अनुसार हालसम्म उक्त कानूनी छिद्रको दुरुपयोग गर्दै ३ लाख २६ हार युरो दम्पच पारिसकेका छन् ।
खुसीको कुरा, उनीहरुको १२औं डिभोर्स चाहिं अष्ट्रियाको सरकारी निकायले मान्यता दिएन । त्यसैले उनीहरु दुवै जनालाई सँगै उक्त मुद्दा चल्नेछ। महिलाको उमेर अहिले ७३ वर्षको छ ।
