— बलरहरू कागिसो रबाडा र मार्को जानसेन ब्याटबाट नायक सावित भएपछि दक्षिण अफ्रिकाले आइतबार पहिलो टेस्टको चौथो दिन पाकिस्तानमाथि दुई विकेटको सनसनीपूर्ण नाटकीय जित निकालेको छ ।
जितका लागि १ सय ४८ रन पछ्याइरहेको दक्षिण अफ्रिका एक समय आठ विकेट गुमाएर ९९ रनको खराब स्थितिमा थियो ।
पाकिस्तानका लागि ३४ वर्षीय मोहम्मद अब्बासले घातक बलिङ गरे र ५४ रनमा ६ विकेट लिएपछि दक्षिण अफ्रिका पराजयको नजिक पुगेको थियो । तर बलरका रूपमा आफ्नो टिमका लागि जित रच्दै आएका रबाडा यसपल्ट ब्याटरका रूपमा पेस भए र उनले २६ बलमा अविजित ३१ रन बनाए ।
मैदानमा चारैतर्फ प्रहार गरेको रबाडालाई जानसेनले उत्तिकै बलियो साथ दिए । जानसेन १६ रनमा अविजित रहे । यी दुईले नवौं विकेटमा ५१ रनको अविजित साझेदारी गरी दक्षिण अफ्रिकालाई रोमाञ्च र सनसनीपूर्ण विजय दिलाएका हुन् ।
अब्बासले लगातार १९.३ ओभर बलिङ गरे । अघिल्लो दिन पनि दुई विकेट लिएका अब्बासले बलरलाई सहयोग गरिरहेको पिचको भरपुर फाइदा लिए र अचुक बलिङ गरे । व्यक्तिगत रूपमा उनको यो पाकिस्तानी टिममा अपत्यारिलो पुनरागमन पनि रह्यो ।
उनले यसअघि अन्तिम पटक सन् २०२१ मा वेस्ट इन्डिजविरुद्ध किङ्सटनमा टेस्ट खेलेका थिए । तर उनको यो बहादुरीपूर्ण प्रदर्शन पनि पाकिस्तानका लागि पर्याप्त रहेन ।
पाकिस्तान १८ वर्षयता दक्षिण अफ्रिकामा पहिलो जितका लागि संघर्षरत रहेको छ र यो क्रम फेरि एकपल्ट कायम रह्यो । यो जितको अर्थ दक्षिण अफ्रिकामा भने विश्व टेस्ट च्याम्पियनसिप फाइनलका लागि छनोट भएको छ । यो खेल अर्को वर्ष जुनमा इंग्ल्यान्डमा हुनेछ । दक्षिण अफ्रिकाको यस विजयले अब अस्ट्रेलिया र भारतमध्ये एक मात्र फाइनल पुग्ने पनि निश्चित भएको छ ।
दिनको सुरुमा एडेन मारक्रम र टेम्बा बभुमाले ठोस ब्याटिङ गरे । दक्षिण अफ्रिकाले दुई विकेट गुमाएर २७ रनबाट अगाडि खेल्न सुरु गरेको थियो । उनीहरूले चौथो विकेटका लागि ४३ रनको साझेदारी गरे । पहिलो इनिङ्समा ८९ रन जोडेका मारक्रम ३७ रन बनाएर अब्बासकै बलमा बोल्ड भए । धेरै कम उचाइ लिएर आएको त्यो बल कुनै पनि अर्थमा खेल्न सकिने खालको थिएन । कप्तान बभुमा पनि ४० रन बनाएपछि अब्बासको बलमा विकेट पछाडि समातिए ।
त्यस अगाडि बभुमाले डेविड बेडिङ्घमसँग ३४ रनको साझेदारी गरे । अल्ट्रा एजको प्रविधिले बभुमा आउट नभएको देखाएको थियो । बलले उनको ट्राउजरको खल्ती मात्र छोडेर गएको थियो । त्यसपछि दक्षिण अफ्रिकाले १२ बलमा तीन रन मात्र बनाउन सक्यो र चार विकेट गुमायो । नसिम साहले केली भेरयनेलाई आउट गरे । अब्बासले बेडिङ्घम र कोरबिन बोचको पनि विकेट लिए । त्यति बेला पाकिस्तानको जित सम्भव देखिएको थियो ।
रबाडा र जानसेनले लञ्चसम्म दक्षिण अफ्रिकालाई आठ विकेट गुमाएर १ सय १६ रनको स्थितिसम्म पुर्याएको थियो । मारक्रम ‘प्लेयर अफ द म्याच’ रहे र उनले भने, ‘अहिले हामीले निकै राहत महसुस गरिरहेका छौं । खेल आफैंमा तनावपूर्ण रह्यो । दक्षिण अफ्रिकी क्रिकेटका लागि विश्व टेस्ट च्याम्पियनसिपको फाइनल पुग्नु आफैंमा ठूलो उपलब्धि हो । त्यसैले हामी भावनात्मक पनि भएका छौं ।’ उनले पहिलो इनिङ्समा बहुमूल्य ८९ रन बनाएका थिए ।
दक्षिण अफ्रिकी कप्तान बभुमाले पनि आफू जितपछि भावपूर्ण बनेको प्रतिक्रिया दिए । उनले भने, ‘यो खेल टेस्ट क्रिकेटका लागि राम्रो विज्ञापन हो । यही खेललाई जित्न पाएकामा हामी सबै खुसी छौं । पूरा खेलमा धेरै उतारचढाव आए । तर अन्त्यमा जित हाम्रै रह्यो ।’
उनले आफू आउट भएको थिएँ अथवा थिइनँ भन्नेमा दुविधा भएको पनि बताए । उनका समकक्षी पाकिस्तानी कप्तान सान मसुदले भने हारका बाबजुद आफ्नो टिमको प्रदर्शनमा गर्व रहेको बताए ।
