— अमेरिकाका प्रमुख टेलिकम कम्पनी एटी एन्ड टी, भराइजन र ल्युमेन टेक्नोलोजीले आफ्ना प्रणालीमा साइबर आक्रमणको प्रयास भएको जानकारी दिएका छन् ।
उनीहरूको सेवा प्रयोग गर्ने विभिन्न व्यक्ती र संस्थाहरूमाथि चिनियाँ साइबर जासुसी समूह मानिने 'साल्ट टाइफुन' ले आक्रमण प्रयास गरेको कम्पनीले जनाएका छन् । साइबर आक्रमण भए पनि कम्पनीका सबै पूर्वाधार सुरक्षित रहेको दाबी गरिएको छ ।
अमेरिकाका प्रमुख दूरसञ्चार सेवा प्रदायक र तिनमा आबद्ध विभिन्न व्यक्ति र समूहलाई निशाना बनाउने प्रयास भएको यो पछिल्लो एक वर्षमा सातौं पटक हो । अन्य घटनाहरूमा पनि ह्याकरहरूले विभिन्न शैली र पद्धति अपनाएर ती नेटवर्कहरूमा पहुँच बनाउन खोजेका थिए । संवदेनशील सूचना प्राप्त गर्ने प्रयासमा साल्ट टाइफुनले गत महिना केही इन्टरनेट सेवा प्रदायकहरूमा पनि आक्रमण गरेको द वाल स्ट्रिट जर्नलले जनाएको थियो । इन्टरनेट सेवा प्रदायकहरूले सरकारी निकायहरूलाई उपलब्ध गराउने अदालतको अनुमती लिएर गरिने ‘वायरट्यापिङ’ वा ‘कल इन्टरसेप्सन’ को प्रणालीमा ह्याकरहरूले पहुँच बनाएको अनुमान गरिएको छ ।
चीनसँग सम्बद्ध मानिएका भोल्ट टाइफुन, फ्ल्याक्स टाइफुनजस्ता थ्रेटहरू यी घटनामा जोडिएको ल्युमन टेक्नोलोजिजको ब्ल्याक लोटस ल्याब्सको अनुसन्धानले देखाएको छ । पछिल्ला यी घटनाबाहेक साइबर आक्रमणकारीहरूले विभिन्न प्रमुख सरकार र तिनका अधिकारीलाई सन् २०२४ मा निकै सताएका थिए । आफ्नो बहुप्रतिक्षित चीन भ्रमणको आसपास अमेरिकी विदेशमन्त्री एन्टनी ब्लिंकेनको टोलीमाथि पनि चिनियाँ ह्याकर समूहले साइबर आक्रमणको प्रयास गरेका थिए । अमेरिकी राष्ट्रपतीय निर्वाचनका दुवै प्रतिस्पर्धी डोनाल्ड ट्रम्प र कमला ह्यारिसका चुनावी अभियानलाई पनि साइबर आक्रमणकारीहरूले तारो बनाए ।
ट्रम्पको अभियानका कतिपय सञ्चार प्रविधिहरूमा इरानी ह्याकरहरूले प्रवेश पाएको चर्चासँगै धनाढ्यहरू इलन मस्क, जेफ बेजस, मार्क जकरबर्ग, टिम कुक लगायतलाई पनि साइबर आक्रमणकारीले हमला गरे । योसँगै अमेरिकी सरकारले साइबर अपराधविरुद्ध आक्रामक कदम चालिरहेको छ । बाइडेन प्रशासनले राष्ट्रिय सुरक्षा मजबुत पार्न व्यापक साइबर सुरक्षा रणनीति अघि सारेको छ ।
