— वैदेशिक रोजगार विभागले इजरायलको दीर्घकालीन स्याहार केन्द्रमा सहायक कामदार (केयर गिभर) को रुपमा पहिलो चरणमा १ हजार नेपाली श्रमिक पठाउने प्रक्रिया अगाडि बढाएको छ । जसमा महिला ६ सय जना र पुरुष चार सय जना रहेका छन् ।
इजरायलले गत असोजमा नै गोलाप्रथाबाट इजरायल जाने श्रमिकको नाम छनोट गरेको थियो । त्यतिखेर इजरायल र हिजबुल्लाहबीचको लडाइँले थप तनाव बढेपछि सरकारले तत्कालको लागि इजरायल पठाउने प्रक्रिया स्थगित गरेको थियो ।
इजरायल र हिजबुल्लाहबीच युद्ध विराम भएपछि परराष्ट्र मन्त्रालयको सहमतिमा श्रम, रोजगार तथा सामाजिक सुरक्षा मन्त्रालयले स्थगित भर्ना प्रक्रियालाई अगाडि बढाएको हो ।
इजरायलको लागि योग्यता पुगेर छानिएका तीन हजार चार सय ६१ जनाको सूचीबाट लक्की ड्रको आधारमा दुई हजार एक सय १२ जना छानिएका थिए । त्यसमध्ये पहिलो चरणमा एक हजार जनालाई पठाउने प्रक्रिया अगाडि बढाएको हो । उनीहरूलाई इजरायलद्वारा छानिएका चार वटा स्वास्थ्य केन्द्रमा पुस १७ देखि २३ गतेसम्म स्वास्थ्य परीक्षण गर्ने समय तोकिदिएको छ । इजरायलले मेडिकल परीक्षणको लागि नेपाल मेडिसिटी अस्पताल, स्टार अस्पताल, हेम्स अस्पताल, मनमोहन मेमोरियल मेडिकल कलेज तथा शिक्षण अस्पताल र क्रिस्टल डायग्नोष्टिक प्रालिलाई छनोट गरेको छ ।
नेपाल र इजरायलबीच भएको श्रम सम्झौताअनुसार सरकारी संयन्त्र मार्फत दीर्घकालीन स्याहार केन्द्रमा कामदार पठाइने भएको हो । यसमा निजी क्षेत्रको संलग्नता छैन । विभागका इजरायल शाखाका सर्म्पक अधिकृत धनञ्जय झाका अनुसार पहिलो लटमा १ हजार जना पठाइएपछि दोस्रो लटमा बाँकी लगिने छ । सरकारले इजरायलको योग्यता पुगेर सूचीकृत भएका सबै श्रमिकलाई आवश्यकताअनुसार लैजानुपर्ने प्रस्ताव राख्दै आएको छ ।
इजरायलका लागि नेपाली राजदूत धनप्रसाद पण्डितले दीर्घकालीन स्याहार केन्द्रमा काम गर्ने नेपाली सुरक्षित रहने बताए । ‘इजरायलमा छनोट भइसकेका श्रमिकलाई रोकेर राख्नुको कुनै अर्थ छैन । यहाँ श्रीलंका र भारतबाट श्रमिकहरू आइरहेका छन् । इजरायलमा लडाइँमा भए पनि श्रमिकहरू सुरक्षित छन्,’ उनले ईकान्तिपुरलाई भने ।
दीर्घकालीन स्याहार केन्द्रमा सबैभन्दा बढी नेपाली १३ सय ४५ जना कार्यरत छन् । उनीहरूले आफूहरू सुरक्षित रहेको बताउँदै आएका छन् । पछिल्लो समयमा विदेशी श्रमिक ल्याउने जिम्मेवारी पाएको इजरायलको जनसंख्या अध्यागमन तथा सीमा प्राधिकरण (पिवा)ले नेपालले लामो समय श्रमिक रोक्ने भए विकल्प हेर्ने बताउन थालेको थियो । पिवाले कृषि क्षेत्रमा भारत र श्रीलंकाबाट श्रमिक ल्याइरहेको छ । केयर गिभरमा भने नेपालीलाई नै प्राथमिकता दिइरहेको छ ।
नेपालका लागि इजरायली राजदूत समुलिक एरी वासले इजरायलमा श्रमिक पठाउने कार्य दुवै पक्षको लागि हितकारी रहेको बताए । ‘इजरायलमा कार्यरत श्रमिक र स्थानीय नागरिकले पाउने सेवा सुविधामा कुनै विभेद छैन,’ एक कार्यक्रममा उनले भनेका थिए, ‘दुई देशबीच सरकारी संयन्त्रमार्फत गरिने भर्ना प्रक्रिया दुवै देशको लागि फाइदाजनक छ ।’
केयर गिभरमा काम गर्ने नेपालीको मासिक तलब ५८ सय ८० इजरायली मुद्रा (करिब दुई लाख २० हजार रुपैयाँ) तोकिएको छ । यसको करार अवधि सुरुमा एक वर्षको हुनेछ । त्यसपछि अधिकतम ५ वर्षसम्म हुनेछ ।
इजरायलमा करिब १४ हजार वटा दीर्घकालीन स्याहार केन्द्र रहेको छ । गत भदौमा इजरायलले भारतबाट पाँच हजार केयर गिभर सहित १५ हजार श्रमिक लैजाने प्रक्रिया अगाडि बढाएको थियो ।
