— नेपाल प्रिमियर लिग (एनपीएल) क्रिकेटका उत्कृष्ट नेपाली खेलाडी दीपेन्द्रसिंह ऐरी सोमबार ओमोडा एन्ड जेइको अटोमोबाइल्सको ब्रान्ड एम्बासडर बनेका छन् । चिनियाँ ओमोडाका लागि नेपालको आधिकारिक वितरक एसपीजी अटोमोबाइल्स र दीपेन्द्रबीच सम्झौता भएको हो ।
सम्झौतामा एसपीजी अटोमोबाइल्सका निर्देशक गौरव शारडा र दीपेन्द्रले हस्ताक्षर गरेका हुन् । निर्देशक शारडाले दीपेन्द्रलाई गाडीको साँचो हस्तान्तरण गरे । सम्झौताको आर्थिक पक्षबारे खुलाइएको छैन । निर्देशक शारडाले भविष्यका लागि यो सुरुआत भएको जनाए ।
१० दिनअघि सम्पन्न एनपीएलमा दीपेन्द्रले सुदूरपश्चिम रोयल्सको नेतृत्व गरेका थिए । लगातार उत्कृष्ट प्रदर्शन गरे पनि सुदूरपश्चिम फाइनलमा जनकपुर बोल्ट्ससँग पराजित भएको थियो । २ सय २७ रन बनाउनुका साथै ८ विकेट लिएका दीपेन्द्रले ३ क्याच लिनुका साथै ७ रनआउट गरेका थिए । फाइनलमा भने दीपेन्द्र खासै चल्न सकेका थिएनन् ।
Brand Ambassador of Dipendra Singh Omodaउत्कृष्ट खेलाडी भएवापत दीपेन्द्रले एसपीजी अटोमोबाइल्सबाट बजारमूल्य ६२ लाख रहेको ओमोडा–ई ५ कार पाएका थिए । दीपेन्द्र अहिले ओमोडा कारकै ब्रान्ड एम्बासडर बनेका हुन् । ‘खेलाडीलाई प्रोत्साहन हुने यस्तो पुरस्कारले आसा र भरोसा बढेको छ,’ दीपेन्द्रले भने । उनी हाल विश्व ट्वान्टी–२० अन्तर्राष्ट्रिय क्रिकेटको अलराउन्डर वरीयतामा दोस्रो स्थानमा छन् ।
बुवा गगनसिंह र आमा नरुदेवी ऐरीसहित दीपेन्द्र कार्यक्रममा उपस्थित भएका थिए । कार्यक्रममा शारडा ग्रुपका अध्यक्ष शिवरतन शारडा, प्रबन्ध निर्देशक सन्दीपकुमार शारडालगायतको उपस्थिति थियो ।
