: फेवातालमा सम्पन्न दोस्रो अन्तर्राष्ट्रिय ड्रागन बोट रेसको सबै विधामा चिनियाँ टोली च्याम्पियन बनेका छन् । दोस्रो नेपाल–चीन फ्रेन्डसिप ड्रागनबोट रेसअन्तर्गत दुई सय किलोमिटर ड्रागनबोट रेसमा चीनको टोङ वान लाओ यो क्लब ४७ सेकेन्डमा निधारित दूरी पूरा गर्दै प्रथम भएको छ ।
यस्तैगरी युन्नान मिन्चु युनिभर्सिटीले निर्धारित दूरी ४८ सेकेन्डमा पूरा गर्दै दोस्रो भएको छ भने लाइओ छङ युनिभसिटी ५० सेकेन्डमा पूरा गर्दै तेस्रो भएको छ । यस्तै गरी युनायन नर्मल युनिभसिटी टिम ५१ सेकेन्डमा निर्धारित दूरी पूरा गर्दै चौथो भयो ।
यस्तैगरी पाँच सय मिटर रेसमा चिनियाँ टोली टोङ वान लाओ यो क्लबले निर्धारित दूरी २ मिनेट ४ सेकेन्डमा पूरा गर्दै प्रथम भएको छ । लाइओ छङ युनिभसिटीले २ मिनेट ७ सेकेन्डमा पूरा गर्दै दोस्रो भएको छ । यस्तैगरी वाँहान स्पोट्र्स युनिभसिटीले २ मिनेट ८ सेकेन्डमा निर्धारित दूरी पूरा गर्दै तेस्रो भयो ।
नेपाली टोली नारा दुई सय मिटरमा सेमिफाइलनमा पुगेको थियो भने अर्को नेपाली टोली पीएमसी पाँच सय मिटर सेमिफाइनलसम्म पुगेरै चित्त बुझाए । प्रथम ड्रागन बोेट रेसमा नेपाली टोलीले धेरै विधामा जित निकाल्दा यस वर्ष भने कुनै पनि विधामा जित निकाल्न सकेन । चिनियाँ खेलाडीले २३ लाख ८४ हजार नेपाली रुपैयाँबराबरको नगद पुरस्कार पाए ।
२ सय र ५ सय मिटर ड्रागन बोट रेसमा समान प्रथम हुनेले ५ हजार डलर, द्वितीयले २ हजार डलर र तृतीयले १२ सय डलर नगद, प्रमाणपत्र र ट्रफी पाए । सहभागी सबै टिमले ५ सय डलर पाएका छन् । ड्रागन बोट रेस फेस्टिभलमा नेपाली ११, चिनियाँ ८ र सिंगापुरको १ टोली गरी २० टिमको सहभागिता रहेको थियो ।
विजयी खेलाडीलाई गण्डकी प्रदेशका मुख्यमन्त्री सुरेन्द्रराज पाण्डे, नेपालका लागि चिनियाँ राजदूत छन् सङ, पोखरा महानगरपालिकाका मेयर धनराज आचार्य, उपमेयर मञ्जु गुरुङलगायतले पुरस्कार वितरण गरेका थिए ।
