— विद्युतका 'हाइटेन्सन लाइन' प्रभावित क्षेत्रको जग्गा मुआब्जाबारे समस्याको विषयमा अध्ययन गर्न संसदीय उपसमिति गठन भएको छ । पूर्वाधार विकास समितिको बुधबारको बैठकमा समितिमा दर्ता भएका उजुरीहरूबारे छलफलपछि उपसमिति गठन गरिएको हो ।
समिति सभापति दीपकबहादुर सिंहका अनुसार हाइटेन्सन लाइन प्रभावित पीडितहरूको तर्फबाट दर्ता भएको उजुरीमाथि छलफल गरेपछि अध्ययन गर्न उपसमिति गठन गरिएको जानकारी दिए । समितिका सदस्य तथा पूर्वऊर्जामन्त्री शक्तिबहादुर बस्नेतको संयोजकत्वमा उपसमिति गठन गरिएको हो ।
समिति सभापति सिंहले भने, 'विद्युत्को हाइटेन्सन लाइन प्रभावित क्षेत्रको जग्गा मुआब्जा विषयमा अध्ययन गर्न पूर्वाधार समिति सदस्य शक्ति बस्नेतको संयोजकत्वमा उपसमिति गठन गरिएको छ,' उनले भने । उपसमितिका सदस्यमा समितिमा रहेका सबै दलको प्रतिनिधित्व हुने गरी राख्ने सिंहले बताए ।
समितिमा हाइटेन्सन लाइन पीडित संघर्ष समितिका संयोजक बसन्त खत्रीले उजुरी दर्ता गराएका थिए । उजुरीमा मर्स्याङ्दी र कुलेखानी जलविद्युत् परियोजनाबाट काठमाडौं ल्याइएको, १३२ केभी प्रसारण लाइनअन्तर्गत काठमाडौं नागढुंगादेखि स्युचाटारसम्मको ८ किलोमिटर क्षेत्रफलमा जग्गाको मुआब्जामा समस्या रहेको उल्लेख छ ।
त्यस्तै, मच्छेगाउँ सतुंगल-स्युचाटारमा करिब १५ किलोमिटर सबस्टेसनसम्मको घरजग्गा प्रभावित रहेको उजुरीमा उल्लेख छ । उपसमितिले ती क्षेत्रको अध्ययन गरेपछि निष्कर्ष निकाल्ने र समितिमा बाँकी छलफल हुने उल्लेख गरिएको छ ।
