। राष्ट्रिय स्वतन्त्र पार्टी (रास्वपा) ले आगामी २० र २१ गते बस्ने केन्द्रीय समिति बैठकका एजेन्डा तय गरेको छ ।
पार्टीका कार्यबाहक महामन्त्री कबिन्द्र बुर्लाकोटीका अनुसार बैठक काठमाडौंको स्वयम्भु स्टार ब्यान्क्वेटमा बस्नेछ । बैठकमा पहिलो दिन समसामयिक राजनीतिक छलफल र रिपोर्टिङ हुनेछ ।
सोही दिन स्थानीय तह उपनिर्वाचनको समीक्षा, संगठन सवलीकरण लगायतका छलफल हुने कार्यतालिका बनेको छ ।
त्यस्तै, सरकारले ल्याएको सहकारीसम्बन्धी विधेयकबारे पनि बैठकमा छलफल हुने बताइएको छ ।
सरकारको सिफारिसमा राष्ट्रपति रामचन्द्र पौडेलले गत १४ पुसमा सहकारीसम्बन्धी अध्यादेश जारी गरेका थिए । अध्यादेशले सहकारी संस्थाहरुको नियमनका लागि ‘राष्ट्रिय सहकारी नियमन प्राधिकरण’ गठन गर्ने प्रस्ताव गरेको छ ।
पाँच सदस्यीय प्राधिकरणमा एक जना अध्यक्षका अतिरिक्त, एकजना विज्ञ, एक चार्टर्ड एकाउन्टेन्ट, सहकारी मन्त्रालयको सहसचिव सदस्य रहने उल्लेख गरिएको छ ।
त्यस्तै, संघीय संसद्मा दर्ता भएका विधेयकहरूबारे पनि बैठकमा छलफल हुने कार्यबाहक महामन्त्री बुर्लाकोटीले बताएका छन् ।
रास्वपाले संविधान परिमार्जनसम्बन्धी छलफल पनि गर्ने बताएको छ ।
जलेश्वर बैठक र राष्ट्रिय भेलामा प्रस्तुत पार्टी सभापतिको राजनैतिक प्रतिवेदनहरूका आधारमा गर्नुपर्ने, पार्टीको आगामी कार्यदिशा, आचारसंहिता लगायतका विषयमा छलफल हुने रास्वपाले बताएको छ ।
