— आरुघाट गाउँपालिका–१ मान्वुस्थित स्याम्चेतमा आगलागीले तीनवटा घर जलेर नष्ट भएको छ । स्थानीय पूर्णबहादुर लामा, बुद्धिमान लामा र आइतसिङ लामाको घर जलेर नष्ट भएको जिल्ला प्रहरी कार्यालय गोरखाका डीएसपी इन्द्रप्रसाद सुवेदीले बताए ।
आगो नियन्त्रणमा पनि आएको उनले बताए । शनिबार साँझ खाना बनाउन आगो बाल्दा नजिकै राखेको मकैको खोस्टाबाट आगो सल्किएर घटना भएको उनले बताए ।
घटनास्थलमा मान्वु प्रहरी चौकीबाट प्रहरी टोली खटाइएको डीएसपी सुवेदीले बताए । ‘स्थानीय र प्रहरीको सहयोगमा आगो नियन्त्रणमा आएको छ,’ उनले भने । आगलागीबाट लत्ताकपडा, अन्नपात जलेर नष्ट भएको छ ।
क्षतिको यकिन विवरण आउनै बाँकी रहेको प्रहरीले जनाएको छ । लस्करै रहेको तीन वटा घर जलेर नष्ट भएको स्थानीय विपना लामाले बताइन् ।
