— आर्सनलले इंग्लिस प्रिमियर लिगको उपाधि होडमा धक्का महसुस गर्नु परेको छ र शीर्षमा रहेको लिभरपुलभन्दा कमजोर भएको छ । आर्सनलले ब्राइटनसँग १–१ को बराबरी खेलेको हो ।
म्यानचेस्टर सिटी भने वेस्ट ह्याममाथि ४–१ को जित निकाल्न सफल रह्यो । लयमा रहेको न्युकासल युनाइटेडले टोटनहमलाई अर्को पीडादायी २–१ को हार आत्मसात् गर्न बाध्य पार्यो । पछिल्लो समय लय गुमाएको चेल्सी पनि क्रिस्टल प्यालेसको हातबाट १–१ को निराशाजनक बराबरीमा रोकियो ।
मिखेल आर्टेटाको आर्सनल पछिल्ला दुई सिजन उप–विजेता रहेको थियो र लगातार चौथो जितको उद्देश्यले ब्राइटनको भ्रमणमा निस्केको थियो । पहिलो हाफमा १७ वर्षीय खेलाडी एथान एवानेरीको गोलको मदतले आर्सनल अगाडि पनि रहेको थियो ।
तर ब्राइटनका लागि जाओ पेड्रोले पेनाल्टीबाट बराबरी गोल गरे । यो नतिजाको अर्थ आर्सनल शीर्षमा रहेको आर्ने स्लटको लिभरपुल भन्दा पाँच अंकले पछाडि रह्यो । लिभरपुलले आर्सनलको तुलनामा अझै दुई खेल कम खेलेको छ ।
सिटीको जितमा भने इर्लिङ हालान्डले दुई गोल गरे । उसको ३४ अंक भएको छ र छैटौं स्थानमा छ । न्युकासल भने ३५ अंकमा पाँचौंमा रह्यो । अन्य खेलमा एस्टन भिल्लाले लेस्टर सिटीलाई २–१, बर्नमाउथले एभरटनलाई १–० र ब्रेन्टफोर्डले साउथह्याम्पटनलाई ४–१ ले हरायो ।
