— पूर्वआईजीपी सर्वेन्द्र खनालले एमाले छाडेका छन् । सामाजिक सञ्जाल फेसबुकमार्फत खनालले आफू कुनै पनि राजनीतिक दलमा आबद्ध नभएको बताएका हुन् । खनाल केही समयदेखि भने पार्टीका औपचारिक कार्यक्रममा भने देखिएका थिएनन् ।
'हजुरहरू मेरो राजनीतिक स्थितिबारे अन्योलमा परेको महसुस गरेर म यसै माध्यमबाट यसलाई स्पष्ट पार्न चाहन्छु कि म अहिले कुनै पनि राजनैतिक पार्टीसँग आबद्ध छैन । म स्वतन्त्र रूपमा स्थानीय र राष्ट्रिय समस्याहरूको समाधानका लागि काम गरिरहेको छु। म देश र समाज हितका लागि आफ्नो समय परिस्थितिअनुकूल सधैं सक्दो कार्यहरु गरिरहने छु,' उनले भने ।
तत्काल कुनै पार्टीमा जाने र पार्टी खोल्ने नसोचेको खनालले बताए । स्वतन्त्रपूर्वक समय परिस्थितिअनुसार कदम चाल्ने उनको भनाइ छ । 'आफैं स्वतन्त्र रहन चाहेँ । अहिले कुनै पनि पार्टीमा जान्न । पार्टी खोल्ने योजना पनि छैन,' खनालले इकान्तिपुरसँग भने ।
नेपाल प्रहरीमा ३० वर्षे सेवावधि पूरा गरेको ३ वर्ष नपुग्दै खनाल राजनीतिमा प्रवेश गरेका थिए । २०७९ असोज ६ गते उनलाई एमाले अध्यक्ष केपी शर्मा ओलीले पार्टीमा भित्र्याएका थिए । २०७९ को प्रतिनिधिसभा चुनावमा उनी काठमाडौं-६ बाट रास्वपाका शिशिर खनालसँग पराजित भएका थिए । शिशिर खनालले १४ हजार २ सय ४ मत ल्याउँदा पूर्वआईजीपी खनालले भने ८ हजार ९ सय ११ मत मात्र प्राप्त गरेका थिए ।
काठमाडौं-५ मा हार बेहोरेको ६ महिनामै २०८० वैशाखमा भएको उपचुनावमा एमालेबाट उम्मेदवार बने । उक्त उपचुनावमा पनि उनले रास्वपा उम्मेदवारबाटै हार बेहोरे । रास्वपा उम्मेदवार स्वर्णिम वाग्लेले ३४ हजार ९ सय १८ मत प्राप्त गर्दा खनाल भने तेस्रो स्थानमा रहँदै ८ हजार ४ सय ८८ मत प्राप्त गरेका थिए । तनहुँ-२ बाट निर्वाचित सांसद रामचन्द्र पौडेल राष्ट्रपति भएपछि भएको उपचुनावमा कांग्रेस उम्मेदवार गोविन्द भट्टराईले भने २० हजार १ सय २२ मत पाएका थिए ।
