— पूर्वी रोल्पाको सुनछहरी-६ फगाममा बोलेरो जिप दुर्घटना हुँदा एक जना यात्रुको ज्यान गएको छ। जिप सडकबाट ५० मिटर तल खस्दा चालकसहित ४ जना घाइते छन्।
प्रहरीका अनुसार लु १ ज ४८८९ नम्बरको जिप सुलिचौर स्थित रुइनीबाङ देखि फगाम जाने भित्री कच्ची सडक खण्डको धुम्सीनजिकै दुर्घटनामा परेको हो। दुर्घटनामा परेर सुनछहरी-६ फगामकी ५७ वर्षीया गौरा रोका मगरको उपचारका क्रममा प्राथमिक स्वास्थ्य केन्द्र सुलिचौरमा मृत्यु भएको हो। चालक धुम्सी निबासी २९ वर्षीय धनीराम घर्तीमगरलाई प्रहरीले नियन्त्रणमा लिएको छ। उनको अवस्था सामान्य छ।
दुर्घटनामा गम्भीर घाइते भएका सहचालक धुम्सीकै ३५ वर्षीय तिलबहादुर घर्तीलाई थप उपचारका लागि लुम्बिनी सीटी अस्पताल बुटवलमा पठाइएको छ। उनको शरीरमा भित्री भागमा चोट छ।
जिपमा सवार सुनछहरी-७ पोर्वाङका ४३ वर्षीय टेकबहादुर बुढा मगरको टाउकोमा चोट लागेको छ भने सुनछहरी-६ का २५ वर्षीय प्रेम रोका मगर पनि घाइते छन्। उनको पनि टाउकोमा चोट लागेको छ। दुवैको उपचार सुलिचौरको प्राथमिक स्वास्थ्य केन्द्रमा भइरहेको छ। घटनाबारे अनुसन्धान जारी रहेको जिल्ला प्रहरी कार्यालय रोल्पाका प्रहरी निरीक्षक एवं सूचना अधिकारी रोहितकुमार शाहीले बताए।
