— काठमाडौं–९ पिंगलास्थानको वागमती होटलमा युवती मृत फेला परेको चार दिनपछि उनीसँगै होटल गएका युवकको पनि शव फेला परेको छ ।शनिबार ओखलढुंगाको सुनकोशी गाउँपालिका–३ सिस्नेरीस्थित जंगलमा रुखमा झुण्डिएको अवस्थामा उनको शव फेला परेको जिल्ला प्रशासन कार्यालय, ओखलढुंगाका प्रमुख जिल्ला अधिकारी डा.नारायण ढकालले जानकारी दिए ।
मंगलबार कागेश्वरी मनोहरा–२ की २१ वर्षीया सुस्मिता खड्का र ओखलढुंगाका २३ वर्षका टेकबहादुर थापा उक्त होटलमा बास बसेका थिए । भोलिपल्ट अंग्रेजी नयाँ वर्षको दिन बुधबार युवती खड्काको शव फेला परेको थियो भने युवक बेपत्ता थिए ।
युवकले बाहिरबाट होटलको ढोका लगाएर बेपत्ता भएपछि प्रहरीले हत्याको आशंका गरेर अनुसन्धान गरिरहेको थियो । होटलमा उनीहरूले ३ हजार रुपैयाँसमेत एड्भान्स दिएका थिए ।
होटल प्रशासनले दुवै जना बसेको ३०८ नम्बरको कोठाको ढोका बुधबार अबेरसम्म नखुलेपछि प्रहरीलाई खबर गरेको थियो । प्रहरी अधिकृत र स्थानीय जनप्रतिनिधिको उपस्थितिमा ढोका खोल्दा खड्का मृत फेला परेकी थिइन् । काठमाडौं महानगरपालिका–९ का वडा सदस्य टेकराज अधिकारीका अनुसार मृत भेटिएकी खड्काको मुखबाट फिँज आएको थियो ।
यद्यपि, उनको शरीरमा कुनै चोटपटक भने देखिँदैनथ्यो । उनले लगाएका कपडा पनि बिग्रेका थिएनन् । जुत्ता समेत लगाएर खाटको कुनापट्टि सुतेको जस्तो देखिन्थ्यो । दुईवटा रेडबुलका खाली डब्बा भने कोठामा भेटिएका थिए । प्रहरीका अनुसार उनीहरूबीच फोन सम्पर्क र म्यासेज आदानप्रदान भएको देखिन्छ । तर, युवतीको मोबाइल भने प्रहरीले फेला पार्न सकेको छैन ।
युवतीसँगै होटल गएका युवक पुस पहिलो हप्ता जापानबाट काठमाडौं आएका हुन् । यसअघि युवकले अध्ययन गरेकै ठाउँमा युवती पनि जापानी भाषासँगै कलेज पढ्दै थिइन् । उनीहरूबीच ३ वर्षअघिदेखि प्रेम सम्बन्धसमेत रहेको पारिवारिक स्रोतले बताएको छ । बिहे नै गर्ने गरेर दुवै परिवारलाई यसबारे जानकारी दिइएको भए पनि युवक र युवतीबीच पछिल्ला दिनमा सम्बन्ध बिग्रेको बताइएको छ ।
मृतकका आफन्तसँग समन्वय गर्दै अनुसन्धान चलिरहेको जिल्ला प्रहरी परिसर काठमाडौंका सूचना अधिकारी प्रहरी उपरीक्षक नवराज अधिकारीले जानकारी दिए । यद्यपि, मृत अवस्थामा भेटिएका युवकका बारेमा भने प्रहरीले आधिकारिक रूपमा कुनै जानकारी सार्वजनिक गरेको छैन । युवतीका परिवारले भने युवकविरुद्ध किटानी जाहेरी दिएको थियो ।
