— वाग्मती प्रदेश सरकारले आफ्नो सीमामा अत्याधुनिक चेकपोस्ट निर्माण सुरु गरेको छ । पहिलो चरणमा मधेश प्रदेशसँग सीमा जोडिएको मुख्य प्रवेशबिन्दुमा चेकपोस्ट निर्माण सुरु गर्न लागेको हो ।
शुक्रबार हेटौंडा–१५ स्थित रातोमाटेमा मुख्यमन्त्री बहादुरसिंह लामाले चेकपोस्ट निर्माणस्थलको अनुगमन गरेका छन् । उनले स्थानीय तहसँग समन्वय गरेर चेकपोस्ट निर्माणस्थलको अनुगमन गरेका हुन् । प्रदेश सरकारले रातोमाटेसहित पहिलो चरणमा सिन्धुली जिल्लाको भिमानमा चेकपोस्ट निर्माण गर्न लागेको हो ।
दोस्रो चरणमा चितवनको नारायणगढ मुग्लिनमा, तेस्रो चरणमा सिन्धुलीको नागथान, रसुवाको रसुवागढी, सिन्धुपाल्चोकको कोदारी र दोलखाको लामाबगरमा चेकपोस्ट निर्माण गर्न लागेको हो । चेकपोस्टमा सवारीसाधानको चेकिङका लागि अत्याधुनिक मेसिनसहित सीसीक्यामेरा र सुरक्षाकर्मी परिचालन गर्ने योजना सरकारको रहेको छ ।वाग्मती प्रदेशको प्रवेशबिन्दुमा हामीले चेकपोस्ट निर्माण गर्न लागेका हौं । यसबाट आन्तरिक सुरक्षा अवस्था थप बलियो हुने अपेक्षा हामीले लिएका छौं,’ मुख्यमन्त्री लामाले भने । स्थानीय तहसँग समन्वय गरेर बिनाविवाद चेकपोस्ट निर्माण गरिने बताए । उनले अन्तर्राष्ट्रिय सीमामा प्रदेश सरकार प्रवेश नगर्ने बताए ।
आन्तरिक मामिला तथा कानुनमन्त्री सुरजचन्द्र लामिछानेले चेकपोस्ट अत्याधुनिक हुने दाबी गरे । ‘हाम्रो प्रदेशको प्रवेश गर्ने स्थानमै चेक भएपछि अन्य स्थानमा समस्या नहुने गरी आन्तरिक व्यवस्थापन गर्नेछौं,’ उनले भने ।
