— नेपाली कांग्रेसको भ्रातृ संस्था नेपाल विद्यार्थी संघका अध्यक्ष दुजाङ शेर्पाले संगठनका केही सदस्यहरूले संगठनको हितविपरीत कार्य गरेको भन्दै छानबिन र कारबाहीका लागि पार्टीमा उजुरी दिएका छन्।
उनले दोषी ठहर भए आफूमाथि समेत कारबाही गर्न, तर संगठनको विधि पद्धतिविपरीत कामहरू रोक्नुपर्ने माग गरेका छन् । नेविसंघकै नेताहरूले अध्यक्ष शेर्पामाथि व्यक्तिगत खातामा पैसा जम्मा गरेर हिनामिना गरेको आरोप लागेको थियो। सोही विषयमाथि छानबिन र कारबाहीको माग गर्दै उनले पार्टीको सुशासन समितिमा उजुरी दिएका हुन् ।
'ममाथि बिना प्रमाण झुटा आरोप, आर्थिक अपचलनको लान्छना लगाई चरित्र हत्या गरी संघको छवि समेत धुमिल गर्न गरिरहेको दुष्प्रयास, संगठनको विधि र पद्धति समेतको धज्जी उडाउने, विद्यार्थी आन्दोलनमाथि चौतर्फी आक्रमण भइरहेको छ,' उनले भनेका छन् ।
पार्टीको महाधिवेशन नजिकिँदा नेविसंघमा पनि पार्टीको गुटगत विभाजनको प्रभाव बढ्दो छ । अध्यक्ष शेर्पाले साझा बनेर काम गर्न नसकेको भन्दै नेता शेखर कोइराला पक्षका केन्द्रीय सदस्यहरूले विभिन्न विषयमा मतान्तर राख्दै समानान्तर गतिविधि गरिरहेका छन् । पछिल्लो पटक सदस्यता वितरणका लागि केन्द्रीय प्रतिनिधि तोक्ने विषयलाई लिएर उत्पन्न विवादबीच संस्थापन र संस्थापनइत्तर पक्षका नेविसंघ नेताहरूबीच आरोपप्रत्यारोप चलेको हो ।
पुस ७ गतेदेखि देशभरका क्याम्पसहरूमा नेविसंघको सदस्यता वितरण अभियान भइरहेको छ भने संस्थापनइतर पक्षले पनि अधिवेशनजस्ता गतिविधि गरिरहेका छन्। कोइराला पक्षका विद्यार्थी नेताहरूले अध्यक्ष शेर्पामाथि आर्थिक हिनामिनाको समेत आरोप लगाएका छन् । शुक्रबार केन्द्रीय सदस्य प्रेमिका राना मगरले विज्ञप्ति नै जारी गरेर विद्यालय पुनर्निर्माणका लागि संकलित रकम अध्यक्ष शेर्पाले व्यक्तिगत खातामा राखेर हिनामिना गरेको आरोप लगाएकी थिइन् ।
त्यसपछि शुक्रबारै अध्यक्ष शेर्पाले पार्टीले यो विषयलाई छानविन र अनुसन्धान गरेर टुंगोमा पुर्याउनुपर्ने माग गरेका हुन् । अध्यक्ष शेर्पाले संघको विधिविधानविपरीत भइरहेका गतिविधिहरूका विषयमा समेत पार्टीलाई जानकारी गराएका छन् ।
'सामाजिक सञ्जालमार्फत् समानान्तर प्रतिनिधि तोक्ने, संघको लेटरप्याड अनाधिकृत रुपमा प्रयोग गर्दै संगठनको हितविरुद्ध गतिविधि गर्ने, संगठनभित्र गुटगत विभाजन सिर्जना गर्ने जस्ता गतिविधिहरूले संघको गरिमा, एकता र अधिवेशन प्रक्रियामा प्रतिकूल प्रभाव पारेको छ,' उनले भने उजुरीमा भनेका छन् ।
