— सिरहाको विष्णुपुर गाउँपालिकाको सरकारी गाडी उपाध्यक्षले नै तोडफोड गरेकी छन् । उपाध्यक्ष गीताकुमारी सिंहले आफूलाई चढ्न नदिएको भन्दै गाडी तोडफोड गरेकी हुन् ।
उनले बा २ झ ३६४३ नम्बरको सरकारी स्कर्पियोमा इँट्टा र ढुंगा प्रहार गर्दा झ्याल, ढोकाको सिसासहित विभिन्न भागमा क्षति पुगेको छ ।
आइतबार बिहान १० बजे आफूलाई घरमा लिन आउन गाडी चालकलाई भने पनि नमानेपछि गाडी तोडफोड गर्नु परेको उपाध्यक्ष सिंहले स्वीकारिन् । 'बिहान १० बजे घरबाट मलाई लिन आउन गाडी चालकलाई फोन गरेँ । तर लिन नआएपछि म मोटरसाइकलमै कार्यालय आउँदा अध्यक्षकै घर अगाडि गाडी रोकिएर राखेको देखेपछि रिस उठेर गाडीमाथि प्रहार गरेकी हुँ,' उनले भनिन् ।
विष्णुपुर गाउँपालिकामा एक आफ्नै र एक भाडाका गरी दुई स्कर्पियो छन् । जसमध्ये गाउँपालिकाका अध्यक्ष र उपाध्यक्षका लागि गाडी किनिएको छ भने भाडाको गाडी प्रमुख प्रशासकीय अधिकृत चढ्छन् ।
उपाध्यक्ष सिंहले पालिकाको दुवै गाडी अध्यक्ष सत्यनारायण यादवले कब्जा गरेर राखेको आरोप लगाइन् । 'म पनि जनताबाट निर्वाचित जनप्रतिनिधि हुँ,' उपाध्यक्ष सिंहले कान्तिपुरसित भनिन्, 'तर, मलाई पाइलापाइलामा विभेद गरिएको छ ।'
अध्यक्ष यादवले भने उपाध्यक्षले ९ बजे नै घरमा लिन आउन बोलाएको र नगएपछि गाडी तोडफोड गरिएको दाबी गरे । 'म अध्यक्ष भएकोले स्वाभाविक रुपमा अलिक बढी व्यस्तता हुन्छ,' उनले भने, 'तर, उपाध्यक्षले गलत व्यवहार देखाउनुभयो ।'
