— कांग्रेस महामन्त्री गगन थापाले संघीयताप्रति राजनीतिक दलका नेताहरू अनुदार रहेको बताएका छन् । सरकार चलाउने ठाउँमा गइसकेपछि नेताहरू संघीयताप्रति अनुदार रहेको र अधिकार आफ्नो मुठ्ठीमा राख्न चाहने मात्रै रहेको बताए ।
'संघीयता सबलीकरणको कसीमा प्रदेशका सवालहरू' विषयक अन्तरक्रिया कार्यक्रममा थापाले शासकीय जिम्मेवारी लिने राजनीतिक दलका नेताहरू सघीयताप्रति उदार हुन नसक्दा अहिलेको अवस्था देखिएको बताए । आफूले काम गर्न नसक्ने तर प्रदेश संरचनाको कारणले गर्दा देश नबनेको भन्ने अवस्थामा रहेको उनले बताए ।
‘हामी राजनीतिक दलका नेताहरू, म पनि हो त्यसमा । जो यो शासकीय जिम्मेवारी लिन्छौँ, हामी कोही पनि संघीयताप्रति उदार छैनौँ । हामी एकदमै अनुदार छौँ, हाम्रो यसमा रुची छैन । हामी यसलाई यसैबाट अघि बढाउँछौँ भन्ने छैन । मैले नयाँ दल पनि हेरेँ, मैले यो क्षेत्रीय दलहरू पनि हेरेँ, सँगै सरकारमा पनि बस्यौँ,' थापाले भने, 'जसले बाहिर जे-जे भनेपनि भित्र सरकार चलाउने बेला कसैले पनि शर्त राख्दैन, संघीय निजामती विधेयक, संघीय प्रहरी विधेयकमा । निजामती विधेकय र प्रहरी विधेयक पारित नहुने भए म सरकारबाट बाहिरिन्छु भनेर मैले आजसम्म कसैले भनेको सुनेको छैन, कसैले भन्दैन ।'
सार्वजनिक खपतको लागि संघीयताको पक्षधर देखिएका दल र नेताहरूले सरकारमा गएपछि त्यो प्रतिबद्धताअनुसार काम नगरिरहेको थापाको भनाइ थियो । 'सबैले बाहिर भन्छन्, सरकार चलाउने ठाउँमा गइसकेपछि त्यो सबै जना हामी अधिकारलाई कसरी मुठ्ठीमा राखिराख्ने भन्ने नै हुन्छौँ, सबै मिल्छौँ हामी,' उनले भने ।
संघीयता नेपालमा अनवरत चल्छ र प्रदेश रही नै राख्छन् भन्ने प्रतिबद्धताका साथ सबै राजनीतिक दलहरू अगाडि बढ्नुपर्ने थापाको भनाइ थियो ।संघीयताको परिणाम राम्रो नआउनुको भारी प्रदेश तहलाई बोकाउन लागिएको भन्दै महामन्त्री थापाले असन्तुष्टि पनि जनाए ।
