— बंगलादेशको एक अदालतले पूर्वप्रधानमन्त्री शेख हसिनाविरुद्ध पुन: पक्राउ पुर्जी जारी गरेको छ । विद्यार्थी नेतृत्वको आन्दोलनले सत्ताच्युत भएपछि गत अगस्टमा भारतमा निर्वासित जीवन बिताइरहेकी ७७ वर्षीया हसिनाविरुद्ध बंगलादेशको अन्तर्राष्ट्रिय अपराध न्यायाधिकरणले मानवताविरुद्धको अपराधको अभियोगमा पक्राउ पुर्जी जारी गरेको हो ।
न्यायाधिकरणले उनीविरुद्ध यसअघि नै पक्राउ पुर्जी जारी गरेको थियो । हसिनाविरुद्ध १५ वर्षे कार्यकालमा राजनीतिक विरोधीहरूको गैरन्यायिक हत्या गरेको तथा व्यापक रूपमा मानवअधिकार उल्लंघन गरेको आरोप लागेको छ । बंगलादेशी सुरक्षाकर्मीले ५ सय भन्दा बढी व्यक्तिलाई गैरकानूनी रूपमा नियन्त्रण गरेका थिए भने तीमध्ये केहीलाई वर्षौंदेखि गोप्य स्थानमा राखिएको थियो ।
पूर्वप्रधानमन्त्री हसिनाले सत्ता छोडेसँगै पीडितहरूले भोगेका कष्टदायी घटनाहरू सार्वजनिक हुन थालेका थिए । 'अदालतले शेख हसिना र उनका सैन्य सल्लाहकार, सैनिक कर्मचारी र अन्य कानुन प्रवर्तन अधिकारीहरूसहित ११ जनाविरुद्ध पक्राउपूर्जी जारी गरेको छ,' न्यायालयका अधिकारीले भने ।
बंगलादेशले गत डिसेम्बरमा भारतलाई कुटनीतिक पत्र पठाउँदै हसिनालाई बंगलादेश फिर्ता गर्न आग्रह गरेको थियो । तर दिल्लीले भने त्यसको जवाफ दिन अस्वीकार गरेको थियो । हसिनाको बहिर्गमनसँगै उनका दर्जनौं सहयोगीलाई हिरासतमा लिइएको छ । उनीहरूलाई प्रहरी नियन्त्रण र कारबाहीमा संलग्न रहेको आरोप लगाइएको छ ।
