— अमेरिकी विदेशमन्त्री एन्टोनी ब्लिन्केनले गाजामा छिट्टै युद्धविराम हुने बताएका छन् । वर्तमान राष्ट्रपति बाइडेनको कार्यकालमा सम्भव नभएपनि नयाँ राष्ट्रपति डोनाल्ड ट्रम्पले अमेरिकाको सत्ता सम्हालेसँगै युद्धविराम हुने उनको भनाइ छ ।
'आवश्यक प्रक्रियापछि र अमेरिकी राष्ट्रपति जो बाइडेन राष्ट्रपति पदबाट हटेपछि सम्भवतः जनवरी २० पछि युद्धविराम हुनेछ,' उनले भने । गत वर्ष हमास र इजरायलबीच युद्धविरामका लागि पटक–पटक प्रयास गरेपनि असफल भएको स्मरण गर्दै ब्लिन्केनले बाइडेन प्रशासनले आफ्नो कार्यकालको अन्त्यसम्म युद्धविराम र बन्दी मुक्त गर्ने प्रयास गरिरहने बताएका छन् ।
'हामी आगामी दुई सातामा युद्धविराम सम्झौतालाई निष्कर्षमा पुर्याउन चाहन्छौं,' दक्षिण कोरियाको राजधानी सोल पुगेका ब्लिन्केनले सञ्चारकर्मीहरूसँग भने, 'यदि हामीले आगामी दुई सातामा टुंगो लगाउन सकेनौं भने पनि यो कुनै बिन्दुमा छिट्टै पूरा हुनेछ ।' जनवरी २० मा कार्यभार सम्हाल्ने तयारीमा रहनुभएका नवनिर्वाचित राष्ट्रपति डोनाल्ड ट्रम्पले इजरायललाई अझ बलियो समर्थन गर्ने प्रतिबद्धता व्यक्त गरेका छन् ।
ट्रम्पले सन् २०२३ अक्टोबर ७ मा भएको आक्रमणपछि हमासले बन्धक बनाएकाहरूलाई मुक्त नगरे हमासले ‘ठूलो मूल्य चुकाउनु पर्ने’ चेतावनीसमेत दिएका छन् । हमासले इजरायलमाथि गरेको भीषण आक्रमण र त्यसको बदलामा इजरायलले गाजामा चलाएको हमासविराधी कारबाहीपछि ब्लिन्केनले मध्यपूर्वको १२ पटक भ्रमण गरिसकेका छन् ।
