— मधेशकेन्द्रित राजनीतिक दलहरू फेरि एक पटक मोर्चाबन्दीको प्रयासमा जुटेका छन् । पटक-पटकको पार्टी विभाजनका कारण खुम्चिएका बेला उनीहरूले विचार तथा मुद्दा मिल्ने दलहरूबीच मिलनबिन्दु खोज्न थालेका हुन् । मुद्दाअनुसारको सहकार्य, कार्यगत एकता वा मोर्चा बनाएर एक ठाउँमा उभिने उयायको खोजीमा दलहरू प्रयासरत देखिएका छन् ।
संसद्भित्रका दुई ठूला दल कांग्रेस र एमालेको संयुक्त सरकारले संविधान संशोधनको लक्ष्य राखेकाले त्यसको दबाब पनि मधेशकेन्द्रित दलहरूले महसुस गरेका छन् । पछिल्लो एक साता यता सबैजसो मधेशकेन्द्रित दलले सहकार्यको प्रयासका लागि कार्यदलसमेत घोषणा गरेका छन् ।
जनता प्रगतिशील पार्टीका अध्यक्ष हृदयेश त्रिपाठीले पछिल्ला केही दिनयता सबै दलका नेतृत्वलाई भेटेर मुद्दा विशेषमा कम्तीमा सहकार्य गरेर जानुपर्ने आवश्यकता दर्शाएका थिए । उनले मुद्दा मिल्ने दलहरूबीच कार्यगत सहकार्यको प्रयास भइरहेको बताए । ‘मधेश आन्दोलन धेरै उचाइमा पुगेर धरायशी हुन पुग्यो, त्यसले मधेशी जनतामा निराशा आयो । त्यसको अनुभूति सबै नेताहरूमा छ,’ उनले भने ‘कम्तीमा खासखास विषयमा एक ठाउँमा बस्नुपर्यो, त्यसका लागि लुज एलायन्स बनाएर जाऔं भन्ने कोणबाट छलफल चल्दैछ ।’
उनले कार्यगत सहकार्यका लागि भइरहेको प्रयासमा नेता तथा दलहरूका तर्फबाट सकारात्मक प्रतिक्रिया आएको बताए । पहिलो चरणमा मधेशकेन्द्रित राजनीतिक पार्टी तथा त्यसपछि आदिवासी जनजाति उत्पीडित दलितकेन्द्रित शक्तिसँग पनि सहकार्यको प्रयास गरिने उनले बताए ।
मधेशकेन्द्रित दलहरूबीच संवाद र सहकार्यको पहल गर्न सीके राउत नेतृत्वको जनमत पार्टीले सोमबार उपाध्यक्ष अब्दुल खानको नेतृत्वमा कार्यदल बनाएको छ ।
महन्थ ठाकुर नेतृत्वको लोकतान्त्रिक समाजवादी पार्टी नेपालले वरिष्ठ उपाध्यक्ष जितेन्द्रप्रसाद सोनारको नेतृत्वमा कार्यकदल बनाएको छ । मधेशकेन्द्रित राजनीतिक पार्टीहरूबीच संवाद, सहकार्य, कार्यगत एकता एवं राजनीतिक मुद्दा र सिद्धान्त मिल्नेसँग पार्टी एकीकरण गर्नेसम्मको सम्भावना खोजीको जिम्मेवारी कार्यदललाई तोकिएको छ ।
कार्यदलको नेतृत्व गरेका लोसपाका वरिष्ठ उपाध्यक्ष सोनारले संघीयता र परिवर्तनवादी शक्तिहरुबीच सहकार्यका लागि आफूहरुले प्रयास गर्ने बताए । ‘संविधान संशोधन, थ्रेस होल्ड बढाउने, दुई दलीय प्रणालीमा जाने कुराहरु सुनिदैँछ,’ उनले भने ‘प्राप्त उपलब्धिहरूमाथि नै खतरा देखिँदैछ । त्यसले विचार र मुद्दा मिल्ने दलबीच सहकार्यको आवश्यकता सबैमा बोध भएको छ । अब कसरी जान सकिन्छ त्यही विषयमा सबै दलबीच छलफल गर्नेछौं ।’
उपेन्द्र यादव नेतृत्वको जनता समाजवादी पार्टी(जसपा) उपाध्यक्ष राजकिशोर यादवको नेतृत्वमा सहकार्यको पहलका लागि कार्यदल बनाइसकेको छ । अशोक राई नेतृत्वको जनता समाजवादी पार्टीले संघीय परिषद्का अध्यक्ष राजेन्द्र श्रेष्ठलाई तथा जनता प्रगतिशील पार्टीले वरिष्ठ उपाध्यक्ष शिवजी यादवको नेतृत्वमा कार्यदल बनाएर दलहरूसँग छलफलको जिम्मेवारी दिइसकेको छ ।
