— कोशी प्रदेश सरकारले आयोजना गर्न लागेको लगानी सम्मेलन वैशाख १८ -१९ गते हुने भएको छ । पूर्वनिर्धारित समयअनुसार माघ ११- १३ का लागि सम्मेलन निश्चित भएको थियो । तर आवश्यक तयारी पूरा नभएको कारण सम्मेलन सार्नु परेको प्रदेशका आन्तरिक मामिला तथा कानुन मन्त्री रेवतीरमण भण्डारीले जनाए ।
उनका अनुसार बिहीबार बसेको मन्त्रिपरिषद्को बैठकले यो निर्णय गरेको हो । परियोजनाहरूको सोकेससङ, कानुनको संशोधन र खरिद प्रक्रियाका लागि थप समय आवश्यक परेको उनले बताए। केही कानुन र नीति संशोधनका लागि संघीय सरकारको सहयोग आवश्यक रहेको पनि मन्त्री भण्डारीले जानकारी दिए ।
प्रदेश सरकारले करिब १ खर्ब रुपैयाँको लगानी भित्र्याउने लक्ष्यका साथ सम्मेलनको तयारी गरिरहेको छ । चालु आर्थिक वर्षको नीति तथा कार्यक्रम र बजेटमार्फत यो सम्मेलन गर्न लागिएको हो । सम्मेलनका लागि विभिन्न समितिहरू र सचिवालय पनि गठन भइसकेको छ ।
मन्त्री भण्डारीले अब पर्याप्त समय भएको र तयारीको चरण पनि केही हदसम्म पूरा भइसकेकाले सम्मेलन भव्य रूपमा सम्पन्न हुने विश्वास व्यक्त गरेका छन् ।
