— अमेरिकाको क्यालिफोर्निया राज्यमा फैलिएको भीषण डढेलोका कारण कम्तीमा पाँच जनाको ज्यान गएको छ । डढेलोका कारण ११ सय भन्दा बढी संरचना जलेर नष्ट भएका र १ लाख ३७ हजार जना विस्थापित भएका अधिकारीहरूले जनाएका छन् ।
लस एन्जलस सहरको नयाँ स्थानमा आगो फैलिरहेको छ । अमेरिकी सञ्चार माध्यहरूका अनुसार लस एन्जलस र यसको छिमेकी भेन्चुरा काउन्टीमा ६ स्थानमा डढेलो फैलिइरहेको छ । तीमध्ये पाँच स्थानका डढेलो पूर्ण रूपमा अनियन्त्रित बनेका छन् ।
प्यालिसेड्स, इटन, हर्स्ट र वुड्लीको आगो नियन्त्रणमा आएको छैन । भेन्चुरा काउन्टीको करिब ११ एकड क्षेत्रफलमा डढेलो फैलिएको छ । सबैभन्दा खराब डढेलो प्यासिफिक प्यालिसेड्स क्षेत्रमा फैलिएको छ । सो क्षेत्रको डढेलो सहरको इतिहासकै विध्वंसकारी भएको जनाइएको छ ।
बीबीसीका अनुसार नयाँ डढेलो अमेरिकी फिल्म उद्योग हलिवुड हिल्समा फैलिरहेको छ । त्यसबाहेक बुधबार साँझबाट हलिवुड हिल्समा फैलिएको आगो एक घण्टा भन्दा कम समयमा २० एकडमा फैलिइसकेको छ ।
क्यालिफोर्निया फायर सर्भिसले हलिउड हिल्समा लागेको डढेलोको मात्रा तीव्र रूपमा फैलिरहेको र आगो नियन्त्रणमा कुनै प्रगति नभएको जनाएको छ । अग्नि नियन्त्रकहरूले पानीको चाप कम हुँदा डढेलो नियन्त्रणमा कुनै प्रगति हुन नसकेको जनाएका बीबीसीले उल्लेख गरेको छ । अमेरिकी राष्ट्रपति जो बाइडेनले डढेलो नियन्त्रणका लागि थप सहयोग उपलब्ध गराउन सेनालाई आदेश दिएका छन् ।
डढेलो फैलिएसँगै धनाढ्यहरूको बसोबास रहेका कतिपय क्षेत्रहरू खाली गराइएको छ । जसका कारण ती स्थानमा लुटपाट हुनसक्ने चेतावनी जारी गरिएको अधिकारीहरूले जनाएका छन् । प्यारिस हिल्टन, बिली क्रिस्टल जस्ता चर्चित कलाकारहरूका निवास नष्ट भएका छन् ।
सीएनएनका अनुसार प्यालिसेड्स क्षेत्रमा १५ हजार ८ सय एकड क्षेत्रमा डेढेलो लागिरहेको छ । उक्त क्षेत्रबा६ ३७ हजार मानिसलाई सुरक्षित स्थानमा पठाइसकिएको छ । १० हजार ६ सय एकड क्षेत्रफलमा डढेलो लागिरहेको इटन क्षेत्रबाट करिब १ लाख मानिसहरू सुरक्षित स्थान सरेका जनाइएको छ ।
इटन क्षेत्रको पासडिनाका मेयर भिक्टर गोर्डोले १ लाख भन्दा बढी स्थानीयलाई अन्यत्र जान चेतावनी जारी गरिएको बताएका छन् । त्यस्तै, हर्स्टमा ८ सय ५५ र लिडियाको ३ सय ४८ एकड भूभाग पनि डढेलोको चपेटामा परेका छन् ।
