— बागमती युथ क्लबले एन्फा महिला लिग फुटबलको दोस्रो चरणमा शुक्रबार वालिङ नगरपालिका टिमविरुद्ध त्यस्तो जित निकालेको छ, जसले टोलीलाई सम्भवतः प्रतियोगिताको प्लेअफमा पुर्याएको छ । विभागका तीन टिमले प्लेअफ खेल्ने निश्चित जस्तै भइसकेको स्थितिमा चौथो टिमका लागि प्रतिस्पर्धामा यिनै दुई टिम थिए ।
यस्तोमा बागमतीको यो जित असाध्यै महत्त्वपूर्ण साबित हुनेछ । दोस्रो चरणमा प्राप्त पहिलो जितपछि बागमतीको ३ अंक भएको छ । लिगको पहिलो चरणमा समेत गरेर बागमतीको यो चौथो जित हो । वालिङ भने लगातार चौथो हार बहोर्दै अंकविहीन भएर पुछारमा रह्यो । दोस्रो चरणमा सहभागी पाँच टिममध्ये शीर्ष चारले प्लेअफ खेल्नेछ ।
विभागीय टोलीहरू अंकतालिकाको शीर्ष तीनमा छन् । त्यसमध्ये एपीएफको ९ तथा आर्मी र पुलिसको समान ७ अंक छ । सातदोबाटोस्थित एन्फा कम्प्लेक्स मैदानमा भएको खेलमा बागमतीले दुवै गोल दोस्रो हाफमा गरेको थियो । अस्मिता खवासले ५२ औं मिनेटमा पहिलो गोल गरेपछि विष्णुमाया बलले ७५ औं मिनेटमा दोस्रो गोल थपिन् ।
शनिबार एपीएफ र आर्मीबीच प्रतिस्पर्धा हुनेछ ।
