— आर्मीले एन्फा वुमेन्स लिगमा सोमबार बागमतीमाथि ३–० को जित निकाल्यो, तर यो सजिलो रहेन् र टिमले धेरै हदसम्म संघर्ष गर्न बाध्य रह्यो । यो जितपछि आर्मीको पाँच खेलबाट १० अंक भएको छ ।
एक दिनको विश्रामपछि महिला लिगको दोस्रो चरणको अन्तिम १० खेल सुरु भएको छन् र त्यसको पहिलो खेलमा आर्मी तीन अंक बटुल्न सफल रहेको हो । बागमती भने तीन अंकमा कायम रह्यो र चौथो स्थानमा रह्यो ।
सात दोबाटोको एन्फा कम्प्लेक्समा आर्मीका लागि सपना लामाले छैटौं मिनेटमा पहिलो गोल गरिन् । त्यसपछि पुनम जर्घामगरले २२ औं मिनेटमा दोस्रो गोल थपिन् । त्यसपछि खेलको लामै समय दुवै टिम स्पष्ट अवसर सिर्जना गर्न असफल रहे ।
दोस्रो हाफको इन्ज्युरी समयको पहिलो मिनेटमा चन्द्रा भण्डारीले तेस्रो गोल गरिन् । प्रतिस्पर्धाको ‘प्लेयर अफ द म्याच’ विमला चौधरी रहिन् । उनले नै पहिलो र तेस्रो गोलका लागि अवसर सिर्जना गरेकी थिइन् । तर उनी नै पहिलो हाफमा पेनाल्टीमा भने चुकिन् ।
