। प्रधानमन्त्री केपी शर्मा ओलीको चीन भ्रमणबारे परराष्ट्रमन्त्री डा. आरजु राणाले १३ बुँदे ब्रिफिङ गरेकी छन् ।
सोमबार प्रतिनिधि सभा अन्तर्गतको अन्तर्राष्ट्रिय सम्बन्ध र पर्यटन समितिमा डा. राणाले प्रधानमन्त्री ओलीको चीन भ्रमणबारे तेह्र बुँदे ब्रिफिङ गरेकी हुन् ।
प्रधानमन्त्री ओली नेतृत्वको प्रतिनिधिमण्डलले गत मंसिर १७ गतेदेखि २० गतेसम्म चीन भ्रमण गरेको थियो । प्रधानमन्त्री ओलीको चालू कार्यकालको पहिलो औपचारिक विदेश भ्रमण भने चीन हो ।
उक्त भ्रमणमा परराष्ट्रमन्त्री डा. राणा पनि सहभागी थिइन् ।
प्रधानमन्त्रीको चीन भ्रमणको क्रममा भएका महत्वपूर्ण उपलब्धीहरू प्राप्त भएको मन्त्री राणाले बताइन् ।
उनका अनुसार भ्रमणका क्रममा नेपालले एक चीन सिद्धान्तप्रति आफ्नो प्रतिबद्धता जनाउँदै आफ्नो भूमिमा चीनविरुद्ध कुनै विखण्डनकारी गतिविधि गर्न नदिने प्रतिवद्धता दोहोर्याएको छ ।
नेपाल चीनबीचको सम्बन्ध पञ्चशीलको सिद्धान्त, असल मित्रता, आपसी साझेदारी र सम्मान तथा अन्तर्राष्ट्रिय मूल्य मान्यता र कानुनमा आधारित रहने र भविष्यमा यो सम्बन्धलाई अझ सुदृढ तुल्याउँदै लैजाने बारेमा मतैक्य रहेको छ ।
भ्रमणका बखत नेपालको सामाजिक तथा आर्थिक रूपान्तरणमा महत्वपूर्ण भूमिका निर्वाह गर्ने गरी सहमति भएको पनि उनले बताएकी छन् ।
मन्त्री राणाका अनुसार बेल्ट एन्ड रोड सहकार्य फ्रेमवर्कमा हस्ताक्षर भएको छ ।
त्यस्तै, टोखा झछहरे सुरुङमार्ग सम्बन्धी पत्र आदान/प्रदान भएको छ । नेपाल/चीन व्यापार अभिवृद्धि सम्बन्धी समझदारीपत्रमा हस्ताक्षर भएको छ ।
नौतले वसन्तपुर दरबार पुनर्निर्माण सम्पन्न प्रमाणपत्र र नगद सहयोगसम्बन्धी पत्र आदान/प्रदान भएको छ । यी लगायतका विषयलाई समेटेर मन्त्री राणाले संसदीय समितिको बैठकमा ब्रिफिङ गरेकी हुन् ।
