— पुलिसले एन्फा वुमेन्स लिगको दोस्रो चरणमा मंगलबार सजिलो जित निकालेको छ । सातदोबाटोको एन्फा कम्प्लेक्समा भएको खेलमा पुलिसले वालिङलाई ४–१ ले हराएको हो ।
यो जितपछि पुलिसको पाँच खेलबाट १० अंक भएको छ । पुलिस पाँच टिममध्ये तेस्रोमा छ । वालिङ अझै अंकविहीन रहेको छ र यसको यो लगातार पाँचौं हार हो । वालिङ पाँच टिममध्ये सबैभन्दा अन्तिम स्थानमा पनि रहेको छ ।
पुलिसको यो जितमा चारै गोल पहिलो हाफमा सम्भव भएको थियो । निरु थापाले १५ औं मिनेटमा गोलको खाता खोलेपछि अनुष्का शेर्पाले २८ औं मिनेटमा दोस्रो गोल थपिन् । ‘प्लेयर अफ द म्याच’ पूजा रानाले ३२ औं मिनेटमा तेस्रो गोल गरिन् ।
चौथो गोल भने ४३ औं मिनेटमा भएको थियो र यो वालिङकी धन बोहराको नाममा आत्मघाती रह्यो । खेल सकिन पाँच मिनेट अगाडि यशोधराकुमारी चिरालले वालिङका लागि एक गोल फर्काइन् ।
