— काठमाडौं उपत्यकामा बसोबास गर्ने मगर समुदायले मंगलबार विशेष उत्सवका रूपमा माघे संक्रान्ति मनाएको छ । उनीहरूले टुँडिखेलमा सामूहिक रूपमा आफ्नो परम्परा एवं संस्कृतिलाई निरन्तरता दिँदै संक्रान्ति मनाएका हुन् । भृकुटीमण्डपमा भेला भई मगर पोसाकमा विभिन्न झाँकीसहित उनीहरू टुँडिखेल पुगेका थिए ।
मगरहरूले माघे संक्रान्तिलाई राष्ट्रिय पर्वका रूपमा मनाउँछन् । मगर समुदायले माघे संक्रान्ति पर्वलाई मरेका पुर्खाहरूलाई पानी चढाउने डि डाँके (मगर भाषामा पानी चढाउने) पर्वका रूपमा मानेका छन् । विशेषगरी गण्डकी, लुम्बिनी क्षेत्रका मगरहरूले यसरी मनाएको पाइन्छ ।
नेपालका आदिवासी जनजातिहरूमध्ये मगर, थारु, मैथिली, नेवार र किरात सम्प्रदायले आ-आफ्नै तरिकाले माघे संक्रान्ति पर्व मनाउँछन् । गैरआदिवासी समुदायले पनि माघे संक्रान्ति मनाउँछन् । थारुहरूले माघे संक्रान्तिलाई माघी पर्वका रूपमा मनाउँछन् भने मगरहरूले ‘माघे संक्रान्ति’ भनी मनाउँछन् ।
