— इजरायली सुरक्षा बल (आडीएफ) ले गाजा क्षेत्रमा आक्रमण पुन: तीव्र पारेको छ । अल जजिराका अनुसार आडीएफले विस्थापितहरूले आश्रय लिइरहेका विद्यालय तथा गाजा पट्टीका घरहरूमा हवाई आक्रमण गरेको हो ।
आइतबार बिहानैदेखि गरिएको आक्रमणमा कम्तीमा २४ जनाको ज्यान गएको छ । गाजामा युद्धविरामका लागि भइरहेको वार्ता निस्कर्षमा पुग्नै लागेको समाचार सार्वजिनक भइरहेका बेला इजरायलले आक्रमण तीव्र पारेको हो ।
अमेरिका, कतार र इजिप्टको मध्यस्थतामा मंगलबार भएको युद्धविराम वार्तामा सहमति जुटिसकेको बताइएको छ । अमेरिकी राष्ट्रपति जो बाइडेन र इजिप्टका राष्ट्रपति अब्देल-फताह अल सिसीले इजरायल र हमासलाई युद्धविराम सम्झौता टुंग्याउन संयुक्त आह्वान जारी गरेका छन् ।
प्यालेस्टानी समूह हमासले सन् २०२३ अक्टुबर ७ मा उत्तरी इजरायलमा आक्रमण गरेपछि दुई पक्षबीच युद्ध चर्किएको हो । उक्त आक्रमणमा कम्तीमा १२ सयको ज्यान गएको थियो ।
त्यसका साथै, हमासले २ सय ५१ जनालाई बन्धक बनाएर लगेको थियो । तीमध्ये नेपालका विपिन जोशीसहित ९४ जना अझै हमासको नियन्त्रणमा छन् । हमासको नियन्त्रणमा रहेकामध्ये ६० जना जीवितै रहेको इजरायली अधिकारीहरूको भनाइ छ ।
गाजास्थित स्वास्थ्य मन्त्रालयका अनुसार अक्टुबर ७ यताको युद्धमा ४६ हजार ६ सय ४५ प्यालेस्टिनीले ज्यान गुमाइसकेका छन् । तीमध्ये एक तिहाइभन्दा बढी बालबालिका छन् ।
प्यालेस्टिनी अधिकारीहरूका अनुसार अक्टुबर ७ यता मारिने बालबालिकाको संख्या १८ हजार नाघिसकेको छ । इजरायली आक्रमणमा १ लाख १० हजार घाइते भएका छन् ।
