— बेलायती संसद् हाउस अफ कमन्समा नेपालको जलवायु परिवर्तन असरसम्बन्धी विषय उठान भएको छ । सत्तारुढ लेबर पार्टीकी सांसद एलेक्स बेकरले मंगलबार संसद्मा उक्त मुद्दा उठाएकी हुन् ।
बेकरले प्रश्न गरिन्, 'नेपाल जलवायु परिवर्तनसँग लड्ने अन्तिम चरणमा छ । गत वर्षको अन्त्यतिर हामीले काठमाडौंमा बाढीबाट दुई सय जनाको मृत्यु भएको देख्यौं। धेरै वर्षदेखि बेलायतको साझेदार र मित्र बनेको यो राष्ट्रलाई सहयोग गर्न बेलायत सरकारले के गरिरहेको छ ?'
सांसद बेकर भूतपूर्व गोर्खा सैनिक तथा नेपाली समुदायको बाक्लो बसोबास रहेको अल्डरसट, फार्नबरो जस्ता क्षेत्रलाई प्रतिनिधित्व गर्ने 'अल पार्टी पार्लियामेन्ट्री ग्रुप अन नेपाल' की अध्यक्ष पनि हुन् । बेकरको उक्त प्रश्नको जवाफमा ब्रिटिस विदेशमन्त्री डेभिड ल्यामीले जलवायु परिवर्तनका असरहरूसँग जुध्न ब्रिटिस सरकारले नेपाललाई सहयोग जारी राख्ने प्रतिबद्धता जनाए । विदेशमन्त्री ल्यामीले बेलायत सरकारले नेपाललाई जलवायु परिवर्तनका असरसँग जुध्न तीन करोड ८५ लाख पाउण्ड (झन्डै साढे ६ अरब रुपैयाँ) सहयोग गरेको बताए ।
त्यस्तै उनले नेपालमा जलवायु परिवर्तनका असर कम गरी विकास कार्यक्रम सञ्चालन गर्न आगामी आठ वर्षका लागि ५ करोड ८० लाख पाउन्ड (झन्डै १० अर्ब रुपियाँ) सहायता दिने निर्णय भइसकेको पनि जनाए । विदेशमन्त्री ल्यामीले जलवायु परिवर्तनको मुद्दामा नेपालसँग बेलायतको सम्बन्ध महत्त्वपूर्ण रहेको पनि बताए ।
सांसद बेकरले एक दिनअघि सोमबार लन्डनस्थित नेपाली दूतावासमा नेपाली कांग्रेसका वरिष्ठ नेता डा. शेखर कोइराला, कार्यवाहक राजदूत विपिन दुवाडी लगायतसँग भेटवार्ता गरेकी थिइन् ।
'हामीले निमन्त्रणा गरेपछि एलेक्स दूतावासमा आइन् । उक्त भेटमा सांसद बेकरसमक्ष जलवायु परिवर्तन, भूतपूर्व गोर्खा जस्ता संवेदनशील विषय संसद्मा पुर्याइदिन आग्रह गरेका थियौं,' दुवाडीले कान्तिपुरसँग भने । उनीसँग अर्को भेट छिट्टै हुने र बाँकी मुद्दामा समेत छलफल गरिने दुवाडीले बताए ।
नयाँ लेबर सरकार गठन भएपछि गत वर्ष अगस्ट महिनामा बेलायतले नेपाललाई 'रिजिलियन्स, एडेप्टेसन तथा इन्क्लुजन' (रेन) कार्यक्रमका लागि तीन करोड ८५ लाख पाउन्ड सहयोग गर्ने घोषणा गरेको थियो । यसअघि तत्कालीन प्रधानमन्त्री ऋषि सुनक नेतृत्वको सरकारको पालामा झन्डै १० अर्ब रुपैयाँ नेपाललाई सहयोग गर्ने घोषणा गरिएको थियो ।
