। म्यान्चेस्टर युनाइटेडले प्रिमियर लिगमा पुनरागमन जित हासिल गरेको छ । गएराति भएको खेलमा युनाइटेडले साउथह्याम्पटनलाई ३-१ ले हराएको हो ।
युनाइटेडको जितमा अमाद डियालोले शानदार ह्याट्रिक गरे । उनले खेलको अन्तिम १० मिनेटभित्र ह्याट्रिक गर्दै टोलीलाई जित दिलाए । त्यसअघि आत्मघाती गोलमार्फत युनाइटेड पछाडि परेको थियो ।
४३औं मिनेटमा मानुयल उगार्टेको नाममा आत्मघाती गोल भएपछि खेलमा पाहुना टोलीले पहिलो हाफमा १-० को अग्रता बनायो । दोस्रो हाफको अन्तिम समयमा युनाइटेडले तीन गोल फर्कायो ।
८२औं मिनेटमा पहिलो गोल गरेका अमादले ९०औं र इन्जुरी समयको चौथो मिनेटमा गोल गर्दै ह्याट्रिक पूरा गरे र युनाइटेडलाई जित दिलाए ।
जितपछि युनाइटेड २१ खेलमा २६ अंक जोड्दै १२औं स्थानमा उक्लिएको छ । साउथह्याम्पटन ६ अंकसहित पुछारमा छ ।
