: आँधीखोला गाउँपालिका-५ कृषि स्थित कृषि-ओहिया सडकखण्डमा शुक्रबार राति ११ बजे टिपर दुर्घटना भएको छ। एक जनाको उपचारका क्रममा मृत्यु भएको छ भने ४ घाइते भएका प्रहरीले जनाएको छ।
दुर्घटनापछि गम्भीर घाइते भएका पर्वतको कुश्मा नगरपालिकाका ३७ वर्षीय चन्द्रबहादुर नेपालीको क्षेत्रीय अस्पताल पोखरामा मृत्यु भएको हो भने अन्य ४ जना उपचाररत रहेको प्रहरी नायब उपरीक्षक हरिप्रसाद पौडेलले जानकारी दिए।
सल्यान सारदा नगरपालिकाका १५ वर्षीय हरि परियार, स्याङ्जा आँधीखोलाका ३३ वर्षीय कमल नेपाल, चितवन राप्ती नगरपालिकाका ४१ वर्षीय प्रकाश विक र ४१ वर्षीया सुमित्रा विकको भने सोही अस्पतालमा उपचार भइरहेको जिल्ला प्रहरी कार्यालय स्याङ्जाले जनाएको छ।
भित्री कच्ची सडकमा कृषिबाट ओहियातर्फ जाँदै गरेको ग १ क ५१३९ नम्बरको आरम्भ निर्माण सेवाको टिपर दुर्घटना भएको हो। सो टिपर सडक देखि अन्दाजी ५० मिटर तल खसेको र घटना बारे अनुसन्धान भइरहेको प्रहरीको भनाइ छ।
