— विपक्षी दलहरूले वर्तमान सरकारले निरंकुश शासन लाद्न खोजेको बताएका छन् । शुक्रबार संसद् भवनमा बैठकपछि जारी संयुक्त प्रेस वक्तव्यमा प्रमुख प्रतिपक्षी दल माओवादीसहितका ७ दलले संयुक्त प्रेस वक्तव्य जारी गर्दै सरकार स्वेच्छाचारी ढंगले अगाडि बढेको बताएका हुन् ।
नेकपा (माओवादी केन्द्र), रास्वपा, राप्रपा, नेकपा एस, नेसपा, आज र राजमोद्वारा जारी संयुक्त वक्तव्यमा कुनै पनि बहानामा निरङ्कुशता, स्वेच्छाचारिता र तानाशाही स्वीकार्य नहुने बताइएको छ ।
विज्ञप्तिमा भनिएको छ, 'हाम्रो संविधानले बहुदलीय प्रतिस्पर्धालाई लोकतन्त्रको एक महत्त्वपूर्ण अन्तरवस्तुका रूपमा आत्मसात गर्दै लोकतन्त्रमा जनमत नै सर्वोपरि हो भन्ने तथ्य स्थापित गरेको छ । ‘थ्रेसहोल्ड’ या अन्य कुनै नाममा दुई दलीय तानाशाही लाद्ने परिकल्पना संविधानले गरेको छैन ।'
वर्तमान सरकार टिकाइराख्नका लागि विपक्षी दललाई फुटाउन खोजिएको समेत ७ दलको भनाइ छ । 'स्वेच्छाचारी र तानाशाही ढङ्गले सत्तामा टिकिराख्न र विपक्षी दलहरूलाई फुटाउन राजनीतिक दलसम्बन्धी अध्यादेश ल्याउने पटक–पटकको कसरतले नेपाली जनताले विभिन्न संघर्षबाट प्राप्त गरेका ऐतिहासिक उपलब्धि खोसिनेसम्मको परिस्थिति देखा परिरहेको छ । लोकतन्त्रको सुन्दरता नै फरक मत र विविधताको सम्मान हो । यो वा त्यो बहानामा निरङ्कुशता, स्वेच्छाचारिता र तानाशाही सिर्जना गर्ने सरकारका उपर्युक्त कदमको हामी विरोध गर्दछौँ,' संयुक्त प्रेस वक्तव्यमा भनिएको छ ।
