— अमेरिकाको राष्ट्रपतिमा निर्वाचित डोनाल्ड ट्रम्पले शपथ लिनुअघि आफ्नै क्रिप्टोकरेन्सी ल्याएका छन् । मिम कोइन 'डलर ट्रम्प' नाम दिइएको डिजिटल मुद्रा केही घण्टामा नै कैयौं अर्ब डलरमा परिणत भएको बीबीसीले जनाएको छ ।
त्यस्तै, उनकी पत्नी मेलानिया ट्रम्पले पनि क्रिप्टोकरेन्सी घोषणा गरेकी छन् । उनले आफ्नो क्रिप्टोकरेन्सीको नाम 'डलर मेलानिया' राखेकी छन् । उनले सामाजिक सञ्जाल एक्समा एक पोस्ट गर्दै 'डलर मेलानिया' खरीद गर्न सकिने जनाएकी छन् ।
गत नोभेम्बरमा भएको चुनावमा विजयी ट्रम्पले अमेरिकाको ४७ औं राष्ट्रपतिका रूपमा सोमबार शपथ लिँदैछन् । ट्रम्प अर्गनाइजेशनको एउटा भातृ निकाय सीआईसी डिजिटल एलएलसीले उक्त भेञ्चरको संयोजन गरेको बीबीसीले जनाएको छ । सीआईसी डिजिटल एलएलसीले ट्रम्पको ब्रान्ड प्रयोग गरिएका जुत्ता तथा अत्तरहरू बिक्री गर्नेगर्थ्यो ।
मिम कोइनहरू इन्टरनेटमा भाइरल रहेका ट्रेन्डलाई थप लोकप्रिय बनाउन ल्याउने गरिन्छ । तर त्यस्ता मिम कोइनको वास्तविक मूल्य धेरै नहुने र लगानीको हिसाबले जोखिम हुने बताइन्छ । तर 'डलर ट्रम्प'को पूँजी घोषणा गरिएको केही घण्टामा नै ५.५ अर्ब डलर पुगेको कोइन मार्क्रेट क्याप डट कमले जनाएको छ ।
यसबाट ट्रम्पले कति आम्दानी गर्छन भन्ने प्रस्ट छैन । यसका झन्डै २० करोड डिजिटल टोकनहरू सार्वजनिक गरिसकिएको र आगामी तीन वर्षमा थप ८० करोड सार्वजनिक गरिने जनाइएको छ । कोइनको कुनै राजनीतिक अभियान, कार्यालय वा सरकारी निकायसँग कुनै सम्बन्ध नभएको बताइएको छ ।
तर आलोचकहरूले भने ट्रम्पलाई राष्ट्रपतीय पदको प्रयोग गरेर लाभ लिन खोजेको आरोप लगाएका छन् । 'ट्रम्पले ८० प्रतिशत स्वामित्व राख्नु र शपथअघि सार्वजनिक गर्नु अरूलाई सिकार बनाउनु जस्तै हो र यसले धेरैलाई चोट पुर्याउन सक्छ,' क्रिप्टो भेन्चर क्यापिटालिस्ट निक टोमाइनोले भनेका छन् ।
पछि आउने लगानीकर्ताहरूलाई ठूलो नोक्सानी गराउने भएकाले यस्ता डिजिटल मुद्राहरूबारै आम बुझाइ गलत छ । सुरूमा चर्चासँगै ह्वातै मूल्य बढ्ने भएपनि पछि बजार मूल्य निकै कम हुने जोखिम रहन्छ । ट्रम्प प्रशासनले क्रिप्टोकरेन्सी उद्योगलाई बढवा दिने यस क्षेत्रका लगानीकर्ताहरूको अपेक्षा छ ।
राष्ट्रपति जो बाइडन प्रशासनले ठगी र सम्पत्ति शुद्धीकरण लगायतमा प्रयोग भएको भन्दै यस्ता कम्पनीहरूविरुद्ध कडा नीति अख्तियार गरेका थिए । विगतमा ट्रम्प पनि क्रिप्टोकरेन्सीका विषयमा खासै उत्साहित थिएनन् । तर अघिल्लो वर्ष बिटकोइनको एक कार्यक्रममा बोल्दै आफू राष्ट्रपति भएपछि अमेरिकालाई 'पृथ्वीको क्रिप्टो राजधानी' बनाउने बताएका थिए ।
