— अमेरिकामा शनिबार साँझदेखि अवरुद्ध भएको टिकटक पुन: सञ्चालनमा आएको छ । सोमबारबाट राष्ट्रपतिको पदभार सम्हाल्न लागेका डोनाल्ड ट्रम्पले ‘टिकटकलाई जोगाउने’ बताएपछि सेवा सुचारु गरिएको टिकटकले उल्लेख गरेको छ । टिकटकले ट्रम्पलाई नै देखाएर सेवा सञ्चालनमा ल्याएको हो ।
सीएनएनका अनुसार टिकटकले ‘राष्ट्रपति ट्रम्पको पहलका कारण अमेरिकामा टिकटक पुन: सञ्चालनमा आएको छ, यहाँहरूको धैर्य र सहयोगका लागि धन्यवाद’ भन्ने सूचनासहित एप सुचारु गरेको छ । करिब १२ घण्टा अवरुद्ध भएपछि १७ करोड अमेरिकी प्रयोगकर्तामाझ टिकटक फेरि चल्न थालेको हो ।
‘वास्तवमै, यसलाई बचाउनुबाहेक हामीसँग विकल्प नै छैन,’ ट्रम्पलाई उद्रित गर्दै रोयटर्सले लेखेको छ । ट्रम्पले राष्ट्रपतिको पदभार सम्हाल्नुअघि आइतबार आयोजना गरेको र्यालीमा टिकटकलाई सञ्चालनमा ल्याउन संयुक्त पहलहरू गर्ने बताएका थिए । आइतबार साँझसम्म अमेरिकामा यो एप प्लेस्टोर र एपस्टोरमा उपलब्ध थिएन ।
‘हाम्रा सेवा प्रदायकहरूसँगको सहमतीअनुसार टिकटकले सेवा सुचारू गर्ने प्रक्रिया अघि बढाएको छ,’ टिकटकले ट्रम्पप्रति कृतज्ञता जनाउँदै विज्ञप्तीमा भनेको छ, ‘अमेरिकाका १७ करोडभन्दा बढी प्रयोगकर्तालाई टिकटक उपलब्ध गराउँदा वा ७० लाखभन्दा बढी साना व्यवसायहरूलाई फस्टाउन मद्दत गर्दा सजाय भोग्नुपर्ने छैन भन्नेमा राष्ट्रपती ट्रम्पले हाम्रा सेवा प्रदायकहरूलाई आवश्यक स्पष्टता र आश्वासन प्रदान गर्नुभएको छ ।’
ट्रम्पले ह्वाइट हाउस प्रवेश गर्नुभन्दा अघिल्लो दिन टिकटकले सार्वजनिक रूपमै उनलाई धन्यवाद दिनुलाई अर्थपूर्ण रूपले हेरिएको छ । अमेरिका-चीनबीचको चिसो सम्बन्धमाझ टिकटकको विषय पेचिलो बन्दै गएको रोयर्टर्सको विश्लेषण छ । ट्रम्पले चिनियाँ सामग्रीमा भन्सार महशुल बढाउने बताइरहेका छन् भने चिनियाँ नेताहरूसँग पनि प्रत्यक्ष सम्पर्क बढाउन चाहेका छन् ।
वासिङ्टनस्थित चिनियाँ दूतावासले टिकटकमाथि दमन गर्न अमेरिकाले अनुचित राज्य शक्तीको प्रयोग गरेको आरोप लगाएको थियो । ‘चीनले आफ्ना वैध अधिकार र हितलाई दृढतापूर्वक सुरक्षित गर्न आवश्यक सबै कदम चाल्नेछ,’ दूतावासका प्रवक्तालाई उद्रित गर्दै रोयटर्सले लेखेको छ ।
टिकटकसम्बन्धी अमेरिकी संघीय सरकारको कानुनलाई त्यहाँको सर्वोच्च अदालतले सदर गरेसँगै शनिबार साँझदेखि नै अमेरिकामा टिकटक चल्न छोडेको थियो । अदालतले शुक्रबार चिनियाँ कम्पनी बाइटडान्सलाई टिकटकको अमेरिकी सञ्चालन बिक्री गर्न वा आगामी आइतबारदेखि देशभर प्रतिबन्ध सामना गर्न सरकारले दिएको अल्टिमेटम सही भएको फैसला गरेको थियो ।
