— दोस्रो हाफको उत्कृष्ट प्रदर्शनको मद्दतले चेल्सीले इंग्लिस प्रिमियर लिगमा सोमबार उल्भ्सलाई ३–१ ले हराएको छ र लिग तालिकाको शीर्ष चारमा प्रवेश गरेको छ । चेल्सीले लिगमा पाँच खेलको हार क्रमलाई पनि टुंग्याएको छ ।
स्टायनफोर्ड ब्रिजमा भएको खेलमा टोसिन एबाराबोयोले चेल्सीका लागि पहिलो गोल गरे । पहिला हाफको इन्ज्युरी समयमा उल्भसका लागि म्याट डोहर्टीले बराबरी गोल फर्काए । त्यसपछि चेल्सीका लागि मर्क कुकुरेला र नोनी माडुकेले गोल गरे ।
यो जितपछि चेल्सीको २२ खेलबाट ४० अंक भएको छ । चौथो स्थानमा प्रवेशका लागि उसले ३८ अंकमा रहेको म्यानचेस्टर सिटीलाई उछिनेको हो । उल्भ्सको रेलिगेसनबाट बच्ने संघर्ष कायम रह्यो र उसको १६ अंक मात्रै छ ।
यस्तै सोमबार नै स्पेनी ला लिगामा भएको खेलमा भिल्लारियलले रियल मार्लोकालाई ४–० ले हरायो । इटालीको सिरी ए मा भने कोमो १९०७ ले युडिनेजीमाथि ४–१ को जित हात पार्यो ।
