— रूसी राष्ट्रपति भ्लादिमिर पुटिनले रुस-युक्रेन संकटका विषयमा नयाँ अमेरिकी प्रशासनसँग वार्ता गर्न खुला रहेको बताएका छन् । डोनाल्ड ट्रम्पले ४७ औं अमेरिकी राष्ट्रपतिका रूपमा शपथ लिएलगत्तै पुटिनको यस्तो भनाइ सार्वजनिक भएको हो । रूसको सुरक्षा परिषद्का सदस्यहरूसँगको बैठकमा पुटिनले यस्तो बताएका हुन् ।
क्रेमलिनले जारी गरेको विज्ञप्तिमा पुटिनले देशको सुरक्षा परिषदका सदस्यहरूसँगको बैठकमा द्वन्द्वको मूल कारण सधैँका लागि हटाउने कुरामा विशेष जोड दिदै दीर्घकालीन शान्तिका लागि काम गर्नुपर्ने बताएको उल्लेख छ ।
राष्ट्रपति पुटिनले युक्रेन संकटको सम्भावित समाधानले अर्को द्वन्द्वको लागि सेनालाई पुनर्गठन गर्न अस्थायी युद्धविरामको सट्टा सबै क्षेत्रका देशहरूको वैध हितको सम्मानमा आधारित दीर्घकालीन शान्ति हुनुपर्ने कुरा दोहोर्याएका थिए । उनले भने, 'संवाद समानता र पारस्परिक सम्मानमा आधारित हुनेछ भन्ने धारणा हो, जसले रणनीतिक स्थिरता र सुरक्षासहितका प्रमुख विषयहरूमा हाम्रो देशहरूले खेल्ने महत्त्वपूर्ण भूमिकालाई विचार गर्नेछ ।'
सुरक्षा परिषद्का सदस्यहरूसँगको बैठकमा पुटिनले मस्कोले कहिले पनि वार्ता र छलफललाई अस्वीकार नगरेको बताउँदै अमेरिकी प्रशासनसँग सहकार्य गर्न सधैँ खुला रहेको बताए । यसका अलावा पुटिनले अमेरिकी राष्ट्रपति ट्रम्पलाई पदभार ग्रहणको बधाई पनि दिए । बैठकमा रुसी विदेशमन्त्री सर्जेई लाभरोभले मस्को नयाँ अमेरिकी प्रशासन र अन्य पश्चिमी नेताहरूसँग सम्पर्क गर्न तयार रहेको रहेको बताए ।
