— नेकपा एकीकृत समाजवादीका अध्यक्ष माधवकुमार नेपालले सरकारको कामबाट जनता निराश भएको बताएका छन् । अध्यक्ष नेपालले ०८४ सालको चुनावमा विकल्प खोज्ने समेत बताए ।
‘सरकारको कामबाट जनता निराश छन् । सरकार गफमा अगाडि छ, परिणाममा पछाडि छ,’ उनले समाजवादी मोर्चाको विचारसभामा भने, ‘०८४ को चुनावमा जनताले विकल्प खोजेका छन् । सरकारले जनताको विश्वास जगाउन सकेको छैन ? विवेचना गर्न आवश्यक छ ।’
उनले जनता समाजवादी पार्टी विभाजन गराउन प्रधानमन्त्री केपी शर्मा ओलीको भूमिका भएकाले उपेन्द्र यादव मोर्चामा आउन नसकेको बताए । उनले समाजवादी मोर्चालाई सशक्त रुपमा अघि बढाउनु पर्ने बताए ।
‘मोर्चालाई सक्रिय बनाउन इन्जेक्शन लगाउनु पर्यो । जसरी अघि बढाउनुपर्ने थियो, सकेनौ,’ उनले भने, ‘मोर्चाले देश र विदेशसम्म तरंग पैदा गर्न सक्छौँ । मोर्चा कतिपय पार्टी चाहेर पनि आउन सकेका छैनन् । प्रतिपक्षहरूलाई पनि समेट्नुपर्छ ।’
