: नेकपा माओवादी केन्द्रका अध्यक्ष पुष्पकमल दाहाल प्रचण्डले संविधान संशोधनका नाममा प्राप्त अधिकार खोसिने खतरा उत्पन्न भएको बताएका छन्।
समाजवादी मोर्चाले मंगलबार काठमाडौंमा आयोजित राष्ट्रिय राजनीति र समाजवादी मोर्चाको कार्यभार विषयक विचार सभामा बोल्दै प्रचण्डले प्राप्त अधिकार खोस्ने गरी संविधान संशोधन गर्न खोजेको भन्दै त्यस्तो कदम आफूहरुलाई स्वीकार्य नहुने समेत बताएका हुन्।
यद्यपी, संविधान संशोधनको प्रचण्डले विरोध गरेपनि समाजवादी मोर्चाकै घटक नेकपा एकीकृत समाजवादीले ‘संविधान संशोधन सम्बन्धी अध्ययन कार्यदल’ गठन गरेको छ। सत्तारूढ नेपाली कांग्रेस र नेकपा एमालेले संविधान संशोधन सुझाव कार्यदल गठनको गृहकार्य अगाडि बढाएपछि नेकपा एसले पनि उपाध्यक्ष प्रकाश ज्वालाको नेतृत्वमा उपमहासचिव गरिमा शाह,सचिव गणेशबहादुर विश्वकर्मा, स्थायी कमिटी सदस्य रामचन्द्र यादव, पोलिटब्युरो सदस्य घनप्रसाद गौतम,पोलिटब्युरो सदस्य राजन राई, गोविन्द बन्दी र शंकर सुवेदी सदस्य रहेका कार्यदल गठन गरेका छन्।
प्रचण्डले सरकारका विगत ६ महिनाका कदम हेर्दा प्रमुख दल र सरकार प्रतिगमनको यात्रामा देखिएकाले समाजवादी मोर्चालाई सशक्त नबनाइए देशलाई दुर्घटनामा पुर्याउन सक्ने उल्लेख गरे। उनले अलोकतान्त्रिक र निरङ्कुश तरिकाले अध्यादेश ल्याइएको आरोप लगाए। माघ १८ गतेको सदन बस्नुभन्दा अगाडि विपक्षी दलहरुको बैठक बसेर साझा धारणा बनाउने र त्यसै अनुसार सदनमा प्रस्तुत हुने उनको भनाइ छ।
उनले आफ्नाले जतिसुकै अपराध गरेका भए पनि तुरुन्तै चोख्याउने र राजनीतिक विरोधीलाई प्रतिशोध साँध्ने काम भएको समेत बताए।प्रचण्डले समाजवादी मोर्चालाई गति दिने प्रयास र विपक्षीहरूलाई उद्देश्यमूलक ढंगले अघि बढाउने प्रयास देशप्रतिको चिन्तामा आधारित रहेको उल्लेख गरे।
