: नेकपा एकीकृत समाजवादीले पार्टीलाई बाहिरबाट आक्रमण गर्ने र भित्रबाट विभाजित गर्ने अनेक षड्यन्त्र भइरहेको निष्कर्ष निकालेको छ। अध्यक्ष माधवकुमार नेपालले जारी गरेको अन्तरपार्टी निर्देशनमा आन्तरिक एकता, जनजागरण तथा जनपरिचालन गर्दै पार्टीलाई मुलुकको अपरिहार्य क्रान्तिकारी शक्तिका रूपमा विकास गर्न अघि बढाउनुपर्ने आवश्यकता रहेको उल्लेख छ।
नेपालले दक्षिणपन्थी अवसरवादका विरुद्ध हाम्रो विद्रोह र पार्टीको पुनर्गठनलाई नेपालको कम्युनिष्ट आन्दोलनकै पुनर्गठन र रूपान्तरणमा बदल्ने दायित्वलाई मध्यनजर गर्न पार्टी पङ्तिलाई आग्रह गरेका छन्। ‘दक्षिणपन्थी अवसरवादका विरुद्ध हाम्रो विद्रोह र पार्टीको पुनर्गठनलाई नेपालको कम्युनिष्ट आन्दोलनकै पुनर्गठन र रूपान्तरणमा बदल्ने हाम्रो दायित्वलाई मध्यनजर राख्दै पार्टी स्थायी कमिटीले गरेका निर्णयहरूलाई आआफ्नो कार्यक्षेत्रमा कार्यान्वयन गर्न सबकल्पबद्ध होऔँ।’ अपानीमा भनिएको छ, ‘हामीलाई बाहिरबाट आक्रमण गर्ने र भित्रबाट विभाजित गर्ने अनेक षडयन्त्रहरू हुँदै आएका छन्, जसलाई हामीले सामना गर्दै आएका छौँ। आन्तरिक एकता, जनजागरण तथा जनपरिचालन र आन्दोलनद्वारा ती सबैको उत्तर दिँदै पार्टीलाई मुलुकको अपरिहार्य क्रान्तिकारी शक्तिका रूपमा विकास गर्न अघि बढौँ !! अनेक चुनौतिहरू छन्तर हाम्रा कमजोरी र सामर्थ्यलाई पहिचान गरेर अगाडि बढदा हाम्रा अगाडि झन धेरै सम्भावना छन भन्ने तथ्यलाई आत्मसात गर्दै अगाडि बढौँ।’
संसद अधिवेशन आह्वान हुनु अगाडि एकीकृत समाजवादीका सांसदहरू बूढानीलकण्ठ, बालुवाटार र शितल निवासमा पार्टी फुटाउन सहज हुने गरी राजनीतिक दलसम्बन्धि अध्यादेश मागेर धाएको थाहा पाएपछि नेतृत्व सशंकित बनेको हो। सरकारले राजनीतिक दलसम्बन्धी अध्यादेश ल्याउँदा पार्टी फुट्ने त्रास भएपछि माओवादी केन्द्रका अध्यक्ष प्रचण्डलाई साथमा लिएर अध्यक्ष नेपालले समाजवादी मोर्चा र विपक्षी दलको साथमा अध्यादेश नल्याउन चेतावनी दिएका थिए। यद्यपी पछिल्लो समय सरकारको सिफारिसमा राष्ट्रपतिमार्फत माघ १८ गते बस्ने गरी संसद् अधिवेशन आह्वान भइसकेको छ।
नेपालले कम्युनिष्ट आन्दोलनमा रूपान्तरणको कार्यभार एकीकृत समाजवादीमा आएको नेपालको भनाई छ। ‘कम्युनिष्ट आन्दोलनमा रूपान्तरणको कार्यभार सिद्धान्ततः नेपालका सबै इमान्दार कम्युनिष्टहरूको कार्यभार हो। तर व्यवहारिकरूपमा यो कार्यभार हाम्रो काँधमा आएको छ। अरु कसैले त्यो जिम्मेवारी वहन नगरेको हुँदा हामीले नेकपा (एकीकृत समाजवादी) गठन गरेर अगाडि बढनु परेको तथ्य हामी सबैले बुझेका छौँ। त्यसैले हाम्रा समस्या र चुनौति वा उपलब्धी र सफलता समग्र कम्युनिष्ट आन्दोलनकै विषय हुन्’ अपानिमा भनिएको छ।
एमाले र माओवादीलाई हेर्ने दृष्टिकोण
एकीकृत समाजवादीले नेकपा (एमाले) सैद्धान्तिक जडता र विसंगतिबाट संठनात्मक निराशा, उकुसमुकुस र पलायनतर्फ उन्मुख हुँदै गरेको आरोप लगाएको छ। पार्टीलाई एकताबद्ध बनाएर हिम्मतका साथ अगाडि बढेर परिस्थितिलाई अनुकुल बनाउनुपर्ने बताएका छन्।
‘नेकपा (एमाले) सैद्धान्तिक जडता र विसंगतिबाट संठनात्मक निराशा, उकुसमुकुस र पलायनतर्फ उन्मुख हुँदै गरेको अवस्थामा त्यसको नेतृत्व सरकार र सार्वजनिक जीवनमा पनि बदनाम हुँदै गएको छ। नेकपा (माओवादी केन्द्र) मा सैद्धान्तिक गतिरोध जस्ताको तेस्तै छ। आजकै अवस्था रहन दिनु कम्युनिष्ट आन्दोलनका लागि खतरनाक हुन सक्छ। यस परिस्थितिमा मुलुकको कम्युनिष्ट आन्दोलनले एउटा जिम्मेवार र शक्तिशाली हस्तक्षेपको माग गरिरहेको छ। त्यसका लागि समय कम हुँदै गएको छ।’ अपानिमा भनिएको छ, ‘हामीले धेरै हण्डर–ठक्कर खाएर बहुमुल्य शिक्षाहरू प्राप्त गरेका छौँ। निर्दिष्ट कार्यभारका वरिपरी पार्टीलाई एकताबद्ध बनाएर हिम्मतका साथ अगाडि बढदा छोटै समयमा परिस्थितिलाई अनुकुल बनाउन सकिन्छ। अहिलेको सत्ता गठबन्धन केवल अराजनीतिक साँठगाँठ हो भन्ने हाम्रो विश्लेषण झनपछि झन पुष्टि हुँदै गएको छ। त्यसका अयोग्यताले आम असन्तुष्टि बढ्ने र सत्ताको नालायकी अझ गम्भीर बन्दै जाने दुश्चक्रमा यो गठबन्धन फस्दै गएको छ। त्यसले हाम्रो पहलकदमीका लागि अनुकुलता नै थपेको छ।’
