— सञ्चार तथा सूचना प्रविधिमन्त्री पृथ्वीसुब्बा गुरुङले कोमामा रहेको अर्थतन्त्रलाई वर्तमान सरकार गठन भएपछि आईसीयूमा ल्याइसकेको बताएका छन् ।
'नेपाल चेम्बर एक्स्पो'को बिहीबार काठमाडौंमा उद्घाटन गर्दै मन्त्री गुरुङले सरकारले मुलुकको अर्थतन्त्रमा देखिएका समस्या समाधानका लागि काम गरिरहेको बताएका थिए । सरकारमा आउँदा अर्थतन्त्र कोमामा रहेको र अहिलेको सरकारले आईसीयूमा ल्याएको उल्लेख गर्दै अब छिटै नै लयमा फर्किने उनको दाबी थियो ।
‘सरकारले अहिले मुलुकको अर्थतन्त्रमा देखिएका समस्या समाधान गर्नको लागि काम गरिरहेको छ । हामी सरकारमा आउँदा त अर्थतन्त्र साँच्चै नै कोमामा थियो । त्यो कोमामा भएको अर्थतन्त्रलाई हामीले कमसेकम अहिले आईसीयूमा ल्याएका छौँ,' मन्त्री गुरुङले भने, 'अब त्यसलाई हामी बाहिर निकाल्न चाहन्छौँ । त्यही उद्देश्यका साथ कानुनी क्षेत्रमा, नीतिगत क्षेत्रमा रहेका समस्या हल गर्नको लागि हामीले अध्यादेश जारी गरेका छौँ । यो अध्यादेशले धेरै कुरा फुकाएको छ भन्ने मलाई लाग्छ ।'
मन्त्री गुरुङले सूचना प्रविधि क्षेत्रलाई लक्षित गरी स्थापित उद्योगलाई सहज बनाउनका लागि अध्यादेश ल्याइएको पनि बताए । 'एआईको एप्लाई कसरी गर्ने भन्ने सबैको चासो थियो । आइटी सेक्टरलाई इन्डस्ट्रीको रुपमा कसरी विकसित गर्ने भन्ने चिन्ता थियो,' उनले भने, 'सबै व्यवसायीहरूको चाहना के थियो भने आइटी सेक्टरमा काम गरिरहेका उद्योग, व्यवसाय उनीहरूले आफ्नो कम्पनीको संस्थाको सहायक संस्थाहरू अरु देशमा पनि खोल्न पाउने परिस्थिति बनोस्, हामीले उनीहरूको प्रतिस्पर्धामा भाग लिन पाइयोस्, त्यहाँ पनि लगानी गर्न सके आइटी सेक्टरमा धेरै विकास गर्न सकिन्छ, नेपाल सरकारको राजस्व पनि वृद्धि गर्न सकिन्छ भन्नुभएको थियो ।’
मन्त्री गुरुङले जिडिपीमा डिजिटल इकोनोमीबाट ३ प्रतिशत सहयोग होस् भन्ने अपेक्षा सरकारले गरेको बताए । अध्यादेश मार्फत त्यसरी कानुनी व्यवस्था गरिएको पनि मन्त्री गुरुङले बताए ।
