— अमेरिकी राष्ट्रपति डोनल्ड ट्रम्पले क्यानडा, मेक्सिको र चीनबाट आफ्नो देशमा भित्रने वस्तुमा नयाँ आयात शुल्क लगाएका छन् । अमेरिकी राष्ट्रपति कार्यालय ह्वाइट हाउसका अनुसार मेक्सिको र क्यानडाका लागि समान २५ प्रतिशत र चीनका लागि १० प्रतिशत आयात शुल्क लगाइएको हो ।
तर राष्ट्रपति ट्रम्पले क्यानडामा उत्पादन हुने तेलले कम आयात शुल्क बेहोर्ने र त्यो फेब्रुअरी १८ देखि मात्र कार्यान्वयनमा आउने बताए । चीन, क्यानडा र मेक्सिको अमेरिकाका मुख्य व्यापार साझेदार हुन् । गत वर्ष अमेरिकामा भएका आयातमा यी तीनले देशको हिस्सा ४० प्रतिशत थियो । क्यानडा र मेक्सिकोले अमेरिकी आयात शुल्कको जवाफ दिने चेतावनी दिइसकेका छन् ।
ट्रम्पले भविष्यमा युरोपेली संघ (ईयू) का लागि समेत आयात शुल्क लगाउने योजना रहेको बताउँदै आएका छन् । युरोपेली देशहरूको समूहले अमेरिकाप्रति राम्रो व्यवहार नगरेकाले आयात शुल्क लगाउनु परेको बताएका बीबीसीले जनाएको छ ।
क्यानडा र मेक्सिकोले तिर्नुपर्ने त्यस्तो भन्सार शुल्क ती देशबाट गैरकानुनी रूपमा भित्रिएको फेन्टनिल औषधिको जवाफ भएको ह्वाइटहाउसकी प्रेस सचिव कारोलिना लेभिटको भनाइ छ । उक्त औषधिका कारण अमेरिकामा दशौ लाखले ज्यान गुमाएका बताइन्छ ।
चुनावी अभियानका क्रमम ट्रम्पले चिनियाँ उत्पादनहरूमा ६० प्रतिशतसम्म आयात शुल्क लगाउने चेतावनी दिएका थिए । तर आफ्नो नयाँ कार्यकालको पहिलो दिनमा भने उनले यसबारे कुनै निर्णय लिएनन् । राष्ट्रपतिको जिम्मेवारी सम्हालेसँगै ट्रम्पले आफ्नो प्रशासनलाई यस विषयमा अध्ययन गर्न आदेश दिएका थिए ।
सन् २०१८ यता अमेरिकामा चीनबाट हुने आयात खस्किएको तथ्यांकहरूले देखाएका छन् ।
