— साउदी अरवको पश्चिम क्षेत्र जिजान आराम्को रिफाइनरी रोड नजिकै रहेको सडक दुर्घटनामा तीन नेपाली श्रमिकको मृत्यु भएको पुष्टि भएको छ । माघ १४ मा सडक दुर्घटनामा परी १५ जनाको ज्यान गएको हो ।
जेद्दास्थित नेपाली महावाणिज्य दूतको कार्यालयका अनुसार मृत्यु हुने नेपाली श्रमिकमा पाल्पाका कृष्ण खत्री, उदयपुरका रूपक कार्की र कपिलवस्तुका मानबहादुर राना रहेका छन् । दुर्घटनामा मृत्यु हुनेमा तीन नेपालीका अतिरिक्त ९ जना भारतीय र तीन जना घानाका नागरिक रहेका थिए ।
२६ जना श्रमिक सवार भ्यान र ट्रेलर एकापसमा ठोक्किंदा दुर्घटना भएको हो । साउदी रेड क्रेसेन्टका प्रवक्ता अहम्मद असिरीका अनुसार गम्भीर घाइते भएका ११ जनाको जिजान र आभा अस्पतालमा उपचार भइरहेको छ । घाइतेमध्ये इलामका सुकबहादुर लिम्बूको अवस्था गम्भीर रहेको र उनको जिजानको बाइस अस्पतालमा उपचार भइरहेकाे छ । ती श्रमिक अरबियन कन्साेलिडेटेड इन्ड्रस्टियल क्लिनिङ सर्भिसेज कर्पाेरेसन (एसीआईसी) कम्पनीमार्फत जिजानको आरम्को प्रोजेक्टमा काम गर्थे ।
साउदी अधिकारीहरूले ड्राइभरको लापरबाही, सवारी साधानको सुरक्षासम्बन्धी मापदण्ड र सडकको अवस्थामा अनुसन्धान सुरु गरिएको साउदीका सञ्चारमाध्यमहरूले जनाएका छन् । विश्व स्वास्थ्य संगठन (डब्लूएचओ)का अनुसार खाडी क्षेत्रमध्ये साउदीमा सबैभन्दा बढी सडक दुर्घटनामा ज्यान जाने गरेको छ । साउदीले सडक दुर्घटनालाई न्यूनीकरण गर्न सडक सुरक्षाको मापदण्डलाई सुधार गरी कार्यान्वयनमा ल्याएको बताउँदै आएको छ ।
