— म्यानचेस्टर सिटीले युरोपेली च्याम्पियन्स लिगको प्ले अफमा १५ पल्टको च्याम्पियन रियल म्याड्रिडको सामना गर्ने भएको छ । प्रतियोगिताको शुक्रबार निकालिएको ‘ड्र’ अनुसार सेल्टिकले बायर्न म्युनिकसँग भिड्नेछ । सन् २०२३ को च्याम्पियन सिटीले सुरुमा इतिहादमा रियलको आतिथ्य गर्नेछ ।
दोस्रो लेगका लागि त्यसको अर्को साता सिटी स्पेन भ्रमणमा निस्कनेछ । अन्य प्ले अफमा ब्रेस्टले पेरिस सेन्ट जर्मेन (पीएसजी), क्लब ब्रुगले एटलान्टना, युभेन्ट्सले पीएसजी आयनहोभन, मोनाकोले बेनफिका, स्पोर्टिङ लिस्वनले बोरुसिया डर्टमुन्ड र फायनउडले एसी मिलानको सामना गर्नेछ ।
नयाँ ढाँचाको प्रतियोगिताअनुसार सहभागी कुल ३६ टिममध्ये शीर्ष आठमा रहेका टिमले स्वतः अन्तिम १६ मा प्रवेश गर्नेछ । यी आठ टिममा लिभरपुल, बार्सिलोना, आर्सनल, इन्टर मिलान, एटलेटिको म्याड्रिड, लेभरकुजन, लिल र एस्टन भिल्ला रहेका छन् । अंक तालिकाको अन्तिम आठ स्थानमा रहेका टिम भने प्रतियोगिताबाट बाहिरिएका छन् ।
अंक तालिकाको नवौंदेखि २४ औं स्थानमा रहेका २४ क्लबबीच हुने प्ले अफका लागि अहिलेको ड्र निकालिएको हो । युरोपेली क्लब फुटबलको दोस्रो ठूलो प्रतियोगिता युरोपा लिगमा भने लाजियो, एथलेटिको बिलबाओ, म्यानचेस्टर युनाइटेड, टोटनहम, इन्ट्राख्ट फ्रायन्कफर्ट, लियोन, ओम्पियाकोज र रेन्जर्स शीर्ष आठ स्थानमा रहे ।
