— प्रसिद्ध धार्मिकस्थल मनकामना र देवघाटलाई जोड्ने उद्देश्यका साथ फिस्लिङदेखि देवघाटसम्म भएको अल्ट्रा र्याफ्टिङ म्याराथन प्रतियोगितामा बागमती प्रदेश पहिलो भएको छ । विजेता बागमतीले ६० हजार नगद पुरस्कार पाएको छ । गण्डकी प्रदेश दोस्रो र कोशी प्रदेश तेस्रो बन्दै क्रमशः ४० र २० हजार नगद पाएका छन् ।
नेपाली सेनाको ‘बी’ टिम चौथो र सेनाकै ‘ए’ टिम पाँचौं बनेको छ । चौथो र पाँचौं टिमले क्रमशः १० हजार र ७ हजार नगद पाएका छन् । मनकामना र देवघाटलाई जोड्ने गरी प्रतियोगिता आयोजना गरिएको आयोजक प्रदेश खेलकुद परिषद् गण्डकीका साहसिक खेलकुद संयोजक वसन्तराज दवाडीले बताए । बुधबार गण्डकी गाउँपालिका–६ भुम्लीचोकबाट प्रतियोगिताको आरम्भ गरिएको थियो । पहिलो दिन फिस्लिङदेखि सिमलताल र दोस्रो दिन सिमलतालदेखि देवघाटसम्म प्रतिस्पर्धा भएको दवाडीले बताए । फिस्लिङदेखि देवघाटसम्म ५० किलोमिटर दूरीमा र्याफ्टिङ प्रतियोगिता भएको थियो ।
प्रतियोगितामा ६ टोलीका ४६ जनाले सहभागिता जनाएका थिए । ‘दुई धार्मिकस्थललाई साहसिक खेलकुदको माध्यमबाट जोड्न प्रतियोगिता गरेका हौं, अल्ट्रा र्याफ्टिङ म्याराथन पहिलो पटक आयोजना गरिएको हो,’ उनले भने, ‘जल विपद्मा पनि सारथि बन्न सकियोस् भन्ने उद्देश्यका साथ आयोजना गरिएको प्रतियोगिता सफल बन्यो, खेलप्रेमी पनि यसबाट उत्साहित हुनुहुन्छ ।’
शुक्रबार तनहुँको आबुखैरेनी गाउँपालिका–५ सिमलतालबाट नवलपुरको गैंडाकोट नगरपालिकास्थित नारायणी बिच रिसोर्टसम्म भएको कायक प्रतियोगितामा तनहुँका रवीन गुरुङ पहिलो बनेका छन् । नारायणी नदीमा भएको निर्धारित ३३ किलोमिटर दूरी उनले दुई घण्टा २८ मिनेट २६ सेकेन्डमा पार गरे । तनहुँकै प्रमोद गुरुङ दोस्रो, उदयपुरका कृष्ण खड्का तेस्रो, धनकुटाका विजम माझी चौथो र गोरखाका सुरेन्द्र चेपाङ पाँचौं बनेको प्रदेश खेलकुद परिषद् प्रशासन शाखाका तोपलाल भुसालले बताए । उनीहरूले क्रमशः २०, १५, १०, ५ र ३ हजार नगद पुरस्कार पाएका छन् । तनहुँ घर भएका १६ वर्षीय अम्मर गुरुङले पनि निर्धारित दूरी सफल रूपमा पार गरेको उनले बताए । कायक प्रतियोगितामा २५ जनाले सहभागिता जनाएका थिए ।
