— नेपाली क्रिकेटलाई एउटा उचाइमा पुर्याएका प्रशिक्षक मोन्टी देसाईसँगको सम्झौता नेपालले टुंग्याएको छ । नेपाल क्रिकेट संघ (क्यान) ले शनिबार प्रेस विज्ञप्ती निकाल्दै भारतीय प्रशिक्षक मोन्टीको सम्झौता नवीकरण नगर्ने जनाएको छ ।
यसअघि क्यानडा र अफगानिस्तानको परामर्श प्रशिक्षक तथा वेस्ट इन्डिजको ब्याटिङ प्रशिक्षक रहिसकेका मोन्टी २०१३ को फेब्रुअरीमा दुई वर्षे सम्झौतासहित नेपाल आएका थिए, जतिखेर नेपाल एकदिवसीय अन्तर्राष्ट्रिय मान्यता गुमाउने संघारमा रहेको थियो ।
उनै मोन्टीको प्रशिक्षणमा नेपालले विश्वकप लिग २ को अन्तिम १२ मध्येको ११ खेलमात्र जितेन, एकदिवसीय मान्यता बचाउदैं सोझै विश्वकप छनोटमा पुगेको थियो । त्यसपछि नेपालले एसीसी प्रिमियर कप जितेर पहिलो पटक एसिया कपमा छनोट भएको थियो । नेपालले एसिया कपमा पाकिस्तान र भारतविरुद्ध खेलेको थियो ।
मोन्टीकै प्रशिक्षणमा नेपाल १० वर्षपछि पुनः ट्वान्टी–२० विश्वकपमा पुग्न सफल भएको थियो । सोक्रममा घरेलु मैदानमा भएको एसिया क्षेत्रको विश्वकपमा छनोट हुँदैं नेपाल दशकपछि पुनः विश्वकपमा पुगेको थियो । मोन्टीको कार्यकालमा नेपालले विशेष गरि घरेलु मैदानमा उच्च प्रर्दशन गरेको थियो ।
तर पछिल्लो समय नेपालको प्रदर्शन सो अनुरुप रहेको छैन । नेपालका लागि प्रमुख प्रतियोगिता मानिएको विश्वकप लिग २ मा सहभागि ८ राष्ट्रमा नेपाल १२ खेलमा ६ अंकसहित सातौं स्थानमा छ । २ खेलमात्र जित्न सकेको नेपाल एकदिवसीय अन्तर्राष्ट्रिय मान्यता जोगाउनलाई संघर्ष गरिरहेको छ । ओमानमा भएको एसिया कप छनोटमा पनि डिफेन्डिङ च्याम्पियन नेपाल चौथो भएको थियो ।
इन्डियन प्रिमियर लिग (आईपीएल) मा राजस्थान रोयल्समा आवद्ध रहिसकेका मोन्टीको योगदान प्रति क्यान आभारी छ । क्यानको विज्ञप्तीमा भनिएको छ, ‘नेपाल पुरुष राष्ट्रिय क्रिकेट टिमले गरेको उत्कृष्ट प्रदर्शन र टिमको सफलतासँग जोडिएका मोन्टी देशाईको योगदान प्रति नेपाल क्रिकेट संघ हार्दिक धन्यबाद व्यक्त गर्न चाहान्छ ।’
