: नेकपा एमालेका उपमहासचिव प्रदीप ज्ञवालीले वैचारिक रूपमा स्पष्ट हुन आवश्यक रहेको बताएका छन्। आइतबार नेकपा एमाले रामेछापले आयोजना गरेको जिल्लास्तरीय प्रशिक्षण कार्यक्रममा बोल्दै ज्ञवालीले विचार कमजोर हुँदा व्यक्ति र समाज जता हावा चल्यो त्यतै लाग्ने बताएका हुन्।
अधिकारको लडाई लडेका नेपाली राजनीतिक दल अब आर्थिक समृद्धिको बाटोमा अघि बढ्नु पर्ने उनको भनाई छ। ‘यसको लागि हामीले नयाँ सोच आवश्यक छ, अब हामीलाई समृद्धिको स्किल आवश्यक छ’, उनले भने। दृष्टिकोण सही हुँदा मात्र सही दिशामा अघि बढ्न सकिने ज्ञवालीले बताए।
‘के चाहिँ राम्रो हो भन्ने कुरा थाहा पाउन पनि दृष्टिकोण चाहिन्छ, दृष्टिकोण नै नभए पछि राम्रो नराम्रो छुट्याउन सकिँदैन, सही र गलत छुट्याउन नसक्नेले कसरी समाज परिवर्तन गर्न सक्छ ?’उनले प्रश्न गरे।
अहिले सामाजिक सञ्जालमार्फत सूचना भन्दा बढी मिस इन्फरमेसन र डिस इन्फरमेशन आइरहेका बताउँदै ज्ञवालीले यसले समाजलाई नै दिग्भ्रमित गराउने काम गरेको बताए । ‘धेरै मानिसहरू भ्रामक समाचारबाट प्रभावित भएका छन्, यसबाट जोगिन हरेक विषयको गहन अध्ययन आवश्यक छ, अहिले पढ्ने बानी एकदमै कमजोर भएर गएको छ’, ज्ञवालीले भने।
ज्ञवालीले परिवर्तनको गतिसँग कार्यकर्तालाई अघि बढ्न निर्देशन दिए। उनले भने, ‘हामीले आफूलाई अपडेट गरेनौँ भने ह्याङ हुन्छौँ, समाज बुझेनौँ भने समाजका समस्या बुझ्दैनौँ र समाज परिवर्तन गर्न सक्दैनौँ।’
