— नेपाली कांग्रेसकी नेता एवम् प्रतिनिधिसभा सदस्य सीता गुरुङले ताप्लेजुङको पाथीभरा मन्दिर क्षेत्रमा केबलकार निर्माणको विषयमा भएको विवादमा सरकारले संवाद र सहमतिबाट समाधान खोज्नुपर्ने बताएकी छन् ।
सरकारले तत्काल वार्ता समिति बनाएर वार्ताका लागि पहल गर्नुपर्ने र सरोकारवालाहरूले समेत संवाद र सहमतिका माध्यमबाट निकास खोज्नुपर्नेमा उनको जोड छ ।
आइतबार संघीय मामिला तथा सामान्य प्रशासनमन्त्री राजकुमार गुप्तालाई मन्त्रालयमा भेटेर केबलकार निर्माणका विषयमा भएको विवाद, राज्यको धरपकड र केही दिनदेखिको आमहड्तालले पूर्वी नेपालको जनजीवन नै प्रभावित भएको भन्दै समाधानका लागि तत्काल पहल गरिदिन ध्यानाकर्षण गराएकी हुन् ।
पाथीभरा मन्दिर क्षेत्रमा केबलकार निर्माण गर्न नहुने भन्दै सरोकारवालाले विरोध जनाउँदै आएकोमा माघ १२ गते निर्माण कम्पनीले काम थालेपछि त्यसको विरोधका क्रममा आन्दोलनकारी र प्रहरीबीच झडप भएको थियो । झडपमा परी घाइतेहरू अहिले पनि अस्पतालमा उपचाररत छन् ।
आन्दोलनरत पक्षले राज्यले गरेको धरपकड तत्काल रोकेर केबलकार निर्माणको काम बन्द गर्नुपर्ने माग गर्दै आइतबारदेखि अरुण पूर्वका ९ जिल्लामा आमहड्तालको घोषणा गरेका छन् । प्रभावित क्षेत्र तेह्रथुमबाट निर्वाचित सांसद गुरुङले केबलकार निर्माणको विषयले यति ठूलो रुप लिने स्थिति निर्माण भएकोमा सरकार गम्भीर हुनुपर्ने बताइन् ।
'केबलकार निर्माण गर्नुपर्छ भन्ने पक्ष र गर्नुहुँदैन भन्ने पक्षका अडान होलान् । त्यसबारे सरकारले वार्ता र संवादबाट समाधानको प्रयास गर्नुपर्छ,' गुरुङले मन्त्री गुप्ताको ध्यानाकर्षण गराउँदै भनिन्, 'तर केबलकार निर्माणको विषयले विवाद बढ्दै जाने, झडप हुने, र राज्यबाट निरन्तर धरपकड भइरहने कुराले समस्याको समाधान हुँदैछ । बरु समस्या बढेर जान्छ । यसले सामाजिक द्वन्द्व बढाउँदै लैजाने स्थिति छ । त्यसकारण तत्काल संवादको वातावरण बनाउन म सरकारको ध्यानाकर्षण गराउँछु ।'
सांसद गुरुङसँगै मन्त्रालय पुगेका स्थानीय अगुवा र सरोकारवालाहरूले पनि दुवै पक्षसँग वार्ता गरेर सरकारले निकास दिनुपर्नेमा जोड दिएका थिए । जवाफमा मन्त्री गुप्ताले आफूले त्यसबारे संवादको वातावरण बनाउन पहल गरिरहेको बताएका थिए ।
आइतबारै सांसद गुरुङसहित स्थानीय सरोकारवालाहरूले त्रिवि शिक्षण अस्पतालमा उपचाररत घाइतेहरूलाई भेटेर स्वास्थ्य लाभको कामना गरेका छन् ।
